Indian players of Paris Paralympics: পেৰিছ পেৰালিম্পিকত দেশৰ নাম উজলাই স্ব-ভূমিত উপস্থিত হ’ল ভাৰতীয় খেলুৱৈৰ দলটো ৷ দিল্লীৰ ইন্দিৰা গান্ধী বিমান বন্দৰত যথেষ্ট সংখ্যক লোকে উষ্ম আদৰণি জনায় ভাৰতীয় খেলুৱৈসকলক ৷ সবিশেষ পঢ়ক...
পেৰিছ পেৰালিম্পিকত ভাৰতে কেবাটাও অভিলেখ ৰচনা কৰাৰ লগতে কেইটামান খেলত প্ৰথমবাৰলৈ পদক জয় কৰিবলৈ সক্ষম হৈছে ৷ পেৰা-শ্বুটাৰ অৱনী লেখাৰা পেৰালিম্পিকত দুটাকৈ সোণৰ পদক লাভ কৰা প্ৰথমগৰাকী ভাৰতীয় মহিলা খেলুৱৈ হিচাপে পৰিগণিত হয় ৷ মহিলাৰ 10 মিটাৰ এয়াৰ ৰাইফল শ্বুটিঙৰ SH1 শাখাত অৱনীয়ে বিশ্ব অভিলেখ ৰচনা কৰি মুঠ 249.7 পইন্ট অৰ্জনেৰে সোণৰ পদক লাভ কৰে ৷
ভাৰতে প্ৰথমবাৰৰ বাবে পেৰা এথলেটিকছ প্ৰতিযোগিতাত ৱান-টু ফিনিছিঙৰ অভিলেখ স্থাপন কৰে ৷ ধৰমবীৰ আৰু প্ৰণৱ সুৰমাই মেনছ ক্লাব থ্ৰ’ প্ৰতিযোগিতাত ক্ৰমে সোণ আৰু ৰূপৰ পদক লাভ কৰে ৷ এই প্ৰতিযোগিতাত ভাৰতে প্ৰথমবাৰৰ বাবে পদক অৰ্জন কৰিবলৈ সক্ষম হৈছে ৷ 34.92 মিটাৰ থ্ৰ’ৰে এছিয়ান অভিলেখ ৰচনা কৰিবলৈ সক্ষম হয় ধৰমবীৰ ৷
T64 হাই জাম্প প্ৰতিযোগিতাত প্ৰবীণ কুমাৰে সোণৰ পদক অৰ্জন কৰে ৷ 2.08 মিটাৰ জাম্পেৰে এছিয়ান ৰেকৰ্ড ভংগ কৰি ভাৰতৰ হৈ ষষ্ঠটো সোণৰ পদক অৰ্জন কৰিবলৈ সক্ষম হয় প্ৰবীণে ৷ এই পেৰালিম্পিকত ভাৰতে মুঠ সাতটা সোণৰ পদক অৰ্জন কৰে ৷
ভাৰতে সমগ্ৰ অলিম্পিক আৰু পেৰালিম্পিকত প্ৰথমবাৰৰ বাবে এগৰাকী ধনুৰ্বিদ চেম্পিয়ন লাভ কৰে ৷ হৰবিন্দৰ সিঙে পোলেণ্ডৰ লুকাছ চিচেকৰ বিৰুদ্ধে ব্যক্তিগত ৰিকাৰ্ভ পেৰা আৰ্চাৰীত সোণৰ পদক লাভ কৰে ।
পেৰালিম্পিকত জেভেলিন থ্ৰ’ত ভাৰতৰ হৈ প্ৰথমবাৰলৈ সোণৰ পদক অৰ্জন কৰা পুৰুষ খেলুৱৈ হিচাপে পৰিগণিত হয় সুমিত আন্টিল ৷ F64 ইভেন্টত অভিলেখ ভংগকাৰী 70.59 মিটাৰ থ্ৰ’ৰে নতুন অভিলেখ ৰচিলে সুমিতে ৷ সুমিতে টকিঅ’ পেৰাঅলিম্পিক 2020 ত স্থাপন কৰা নিজৰেই অভিলেখ এবাৰ দুবাৰ নহয়, তিনিবাৰকৈ ভংগ কৰিলে পেৰিছ পেৰালিম্পিকত ৷ (ANI)
