স্পৰ্টছ ডেস্ক, ৩০ জুন : শনিবাৰৰ দিনটো ভাৰতৰ বাবে এক ঐতিহাসিক দিনৰ সাক্ষী হৈ ৰ’ল ৷ কিয়নো আইচিচি টি-২০ বিশ্বকাপ ২০২৪ ৰ ফাইনেলত দক্ষিণ আফ্ৰিকাক ৭ ৰাণত পৰাস্ত কৰি ভাৰতে বিজয়ৰ খিতাপ দখল কৰিবলৈ সক্ষম হৈছে ।
এয়া হৈছে ৰোহিত শৰ্মাৰ অধিনায়কত্বত টি-২০ বিশ্বকাপত ভাৰতে দখল কৰা দ্বিতীয়টো খিতাপ । ২০০৭ চনৰ টি-২০ বিশ্বকাপত এম এছ ধোনীয়ে ভাৰতক প্ৰথমবাৰৰ বাবে বিশ্ব চেম্পিয়নৰ খিতাপ দখল কৰাবলৈ সক্ষম হৈছিল ।
আকৌ এবাৰ ভাৰতীয় দলটো দক্ষিণ আফ্ৰিকাক পৰাস্ত কৰি টি-২০ বিশ্বকাপ ২০২৪ৰ চেম্পিয়ন হৈ পৰিছে । এই মেচখনত প্ৰথমতে ভাৰতে ২০ অভাৰত ৭ টা উইকেট হেৰুৱাই ১৭৬ ৰাণ সংগ্ৰহ কৰে । ভাৰতে দক্ষিণ আফ্ৰিকাক ১৭৭ ৰাণৰ লক্ষ্য বান্ধি দিছিল ৷ কিন্তু দক্ষিণ আফ্ৰিকাৰ দলটোৱে ২০ অভাৰত ৮ টা উইকেট হেৰুৱাই মাত্ৰ ১৬৯ ৰাণহে কৰিবলৈ সক্ষম হয় ৷ যাৰ ফলত মেচখনত ৭ ৰাণত পৰাস্ত হয় দক্ষিণ আফ্ৰিকা । এই মেচৰ শ্ৰেষ্ঠ খেলুৱৈ আছিল বিৰাট কোহলী ।
- দক্ষিণ আফ্ৰিকাৰ ইনিংছ - (১৬৯/৮)
দক্ষিণ আফ্ৰিকাৰ হৈ কুইণ্টন ডি কক আৰু ৰিজা হেণ্ড্ৰিক্সে ইনিংছ আৰম্ভ কৰে । দ্বিতীয় অভাৰৰ তৃতীয় বলত হেণ্ড্ৰিক্সক ৪ ৰাণৰ স্ক’ৰত বলিং কৰি ভাৰতক পেভিলিয়নৰ বাট দেখুৱাই জস্প্ৰিত বুমৰাহে । ইয়াৰ পাচত আৰ্শদীপ সিঙে তৃতীয় অভাৰৰ তৃতীয়টো বলত আইডেন মাৰ্কৰামক ঋষভ পন্তৰ হাতত ৪ ৰাণত কেচ আউট কৰে । আফ্ৰিকাৰ তৃতীয় মোক্ষম আঘাত হৈছে যেতিয়া অক্ষৰ পেটেলে ট্ৰিষ্টান ষ্টাবছক ৩১ ৰাণ কৰি আউট কৰে ।
ইয়াৰ পিছত কুইণ্টন ডি ককক কুলদীপ যাদৱৰ হাতত আৰ্ষদীপ সিঙে ৩৯ ৰাণৰ ব্যক্তিগত স্ক’ৰত আউট কৰে । ইয়াৰ পিছত হাইনৰিখ ক্লাচেনে ৫২ ৰাণৰ ইনিংছ খেলি ভাৰতৰ হাতৰ পৰা মেচখন কাঢ়ি নিবলৈ যৎপৰোনাস্তি চেষ্টা কৰে ৷ কিন্তু ভাৰতীয় বলাৰসকলে ক্লাচেন (৫২) আৰু ডেভিদ মিলাৰক ২১ ৰাণ আউট কৰি দলটোক বিজয়ৰ দিশলৈ আনে । দক্ষিণ আফ্ৰিকাৰ হৈ মাৰ্কো জান্সেনে ২ ৰাণ, কেশৱ মহাৰাজে ২ ৰাণ, কাগিছ’ ৰাবাদাই ৪ ৰাণ আৰু এনৰিচ নৰ্টজে ১ ৰাণহে সংগ্ৰহ কৰে ।