নিউজ ডেস্ক, 25 ফেব্ৰুৱাৰী: ভাৰত আৰু ইংলেণ্ডৰ মাজত অনুষ্ঠিত হৈ থকা পাঁচখনীয়া টেষ্ট শৃংখলাৰ চতুৰ্থ টেষ্টত বিজয়ৰ দিশে আগুৱাইছে ভাৰতে ৷ তৃতীয় দিনৰ আৰম্ভনিতে ভাৰতে 219 ৰানৰ পৰা পুনৰ বেটিং আৰম্ভ কৰে ৷ ধ্ৰুৱ জুৰেলৰ দৰ্শনীয় অৰ্ধশতকৰ সহায়ত 307 ৰাণ সংগ্ৰহ কৰে ভাৰতে ৷ কিন্তু 46 ৰাণত ইংলেণ্ডতকৈ পিচপৰি থাকে ভাৰত ৷
দ্বিতীয় ইনিংছ আৰম্ভ কৰি ইংলেণ্ডে প্ৰথমৰ পৰাই উইকেট হেৰুৱাবলৈ ধৰে ৷ 53.5 অভাৰত আটাইকেইটা উইকেট হেৰুৱাই ইংলেণ্ডে সংগ্ৰহ কৰে মাত্ৰ 145 ৰাণ ৷ আলহী দলটোৰ হৈ ক্ৰেৱলেয়ে 60 আৰু বেয়াৰষ্ট’ৱে 30 ৰাণ কৰাৰ বাহিৰে কোনো এগৰাকী খেলুৱৈয়ে সন্তোষজনক ৰাণ কৰিবলৈ সক্ষম নহ’ল ৷
ভাৰতৰ হৈ অভিজ্ঞ স্পিনাৰ অশ্বিনে 15.5 অভাৰত 51 ৰাণ দি ইংলেণ্ডৰ পাঁচটা উইকেট দখল কৰে ৷ কুলদ্বীপ যাদৱে 15 অভাৰত 22 ৰাণ দি 4 টা উইকেট দখল কৰে ৷ ৰবীন্দ্ৰ জাদেজাই দখল কৰে এটা উইকেট ৷ দ্বিতীয় ইনিংছৰ বেটিং আৰম্ভ কৰি ভাৰতে তৃতীয় দিনৰ খেলৰ শেষলৈকে 8 অভাৰত কোনো উইকেট নেহেৰুওৱাকৈ 40 ৰাণ সংগ্ৰহ কৰিছে ৷ ৰোহিত শৰ্মাই 24 আৰু জয়ছোৱালে 16 ৰাণ কৰি খেলি আছে ৷
তৃতীয় দিনা মেচৰ প্ৰথম ইনিংছত ভাৰতে দুপৰীয়াৰ ভোজন বিৰতিলৈকে সকলো উইকেট হেৰুৱাই 307 ৰান সংগ্ৰহ কৰিছে । উইকেটকীপাৰ বেটছমেন ধ্ৰুৱ জুৰেলে 90 ৰানৰ দৰ্শনীয় ইনিংছ খেলে । আকাশদীপে 29 টা বল খেলি 9 ৰান সংগ্ৰহ কৰে, য’ত এটা ছিক্সাৰো আছে ।
দ্বিতীয় দিনৰ খেলৰ শেষলৈকে ভাৰতে 7 টা উইকেট হেৰুৱাই 219 ৰান সংগ্ৰহ কৰিছিল । জয়ছোৱালক বাদ দি ভাৰতৰ টপ অৰ্ডাৰে ভাল প্ৰদৰ্শন কৰিব নোৱাৰিলে দ্বিতীয় ইনিংছত । তৃতীয় দিনা ধ্ৰুৱ জুৰেলে 30 আৰু কুলদীপ যাদৱে 17 ৰানৰ পৰা বেটিং কৰিবলৈ আহে । কুলদীপে আৰু ২ ৰান সংযোজন কৰি 19 ৰান কৰাৰ পিচতেই আউট হয় । ইয়াৰ পিচত ধ্ৰুৱ জুৰেলে সুন্দৰ প্ৰদৰ্শন কৰি 96 টা বলত অৰ্ধশতক সম্পূৰ্ণ কৰে ।