স্প’ৰ্টছ ডেস্ক, 10 অক্টোবৰ:দেশৰ বিশিষ্টউদ্যোগপতি তথা টাটা গ্ৰুপৰ অধ্যক্ষ ৰতন টাটা এই পৃথিৱীত আৰু নাই । বুধবাৰে নিশা মুম্বাইৰ ব্ৰীচ কেণ্ডি হাস্পতালত চিকিৎসাধীন অৱস্থাতে মৃত্য়ুবৰণ কৰে দেশৰ বিশিষ্ট উদ্যোগপতিগৰাকীয়ে ৷
ৰতন টাটা হৈছে দেশৰ অন্যতম সন্মানীয় আৰু প্ৰিয় উদ্যোগপতি, যিয়ে টাটা গ্ৰুপক এক নতুন শিখৰলৈ লৈ গৈছিল ৷ বিভিন্ন ক্ষেত্ৰত অৱদান আগবঢ়াইছিল ৰতন টাটাই, নিঃস্বাৰ্থ সেৱাৰ বাবেই তেওঁ বিপুল জনপ্ৰিয়তা লাভ কৰিবলৈ সক্ষম হয় ।
ৰতন টাটাৰ দূৰদৰ্শী নেতৃত্বক বহুতে প্ৰশংসা কৰিছে ৷ তেওঁ ব্যৱসায়িক উদ্যোগৰ জৰিয়তে ক্ৰীড়া উদ্যোগলৈও আগবঢ়াইছে অৰিহণা । বিশিষ্ট ব্যক্তিগৰাকীৰ মৃত্যুত ক্ৰীড়াজগতৰ অধিকাংশ লোকেই শোকপ্ৰকাশ কৰে ৷
টীম ইণ্ডিয়াৰ অধিনায়ক ৰোহিত শৰ্মা, প্ৰাক্তন ক্ৰিকেটাৰ ৰবি শাস্ত্ৰীকে ধৰি বহুকেইগৰাকী প্ৰাক্তন খেলুৱৈয়ে সামাজিক মাধ্যমৰ জৰিয়তে ৰতন টাটাক জনাইছে শ্ৰদ্ধাঞ্জলি ৷
এই খবৰ শুনাৰ পিছত সামাজিক মাধ্যমৰ প্লেটফৰ্মৰ জৰিয়তে ৰতন টাটাৰ প্ৰতি থকা স্নেহ প্ৰকাশ কৰে প্ৰাক্তন ভাৰতীয় ক্ৰিকেটাৰ শচীন তেণ্ডুলকাৰে । শচীনে এক্সত লিখিছে এনেদৰে, "ৰতন টাটাই কেৱল তেওঁৰ জীৱনতে নহয়, মৃত্যুতো দেশক কঁপাই তুলিছে । তেওঁৰ লগত কিছু সময় কটাইছিলো । কিন্তু তেওঁক কেতিয়াও লগ নোপোৱা লাখ লাখ মানুহেও বৰ্তমান মোৰ দৰেই কষ্ট পাইছে । এয়াই তেওঁলোকৰ প্ৰভাৱ । জীৱ-জন্তুৰ প্ৰতি থকা প্ৰেমৰ পৰা আৰম্ভ কৰি তেওঁৰ দান-বৰঙণিলৈকে টাটাই দেখুৱাইছে যে প্ৰকৃত প্ৰগতি তেতিয়াহে সম্ভৱ হ’ব, যেতিয়া আমি নিজৰ যত্ন ল’ব নোৱাৰাসকলৰ যত্ন লওঁ । মিষ্টাৰ টাটা, আপুনি যিবোৰ প্ৰতিষ্ঠান গঢ়ি তুলিছিল, আপোনাৰ অস্তিত্ব সেইবোৰত জীয়াই থাকিব" ৷
ক্ৰীড়াবিদসকলৰ ৰতন টাটালৈ শ্ৰদ্ধাঞ্জলি
সোণৰ হৃদয় আছিল ৰতন টাটাৰ, সকলোকে ভাল কৰি জীৱনটো অতিবাহিত কৰা এজন ব্যক্তি হিচাপে আপোনাক সদায় স্মৰণ কৰি থাকিব ছাৰ: ৰোহিত শৰ্মা