শিৱসাগৰ, ২৩ জুলাই :অসমৰ ফুটবলপ্ৰেমীৰ বাবে এক অত্যন্ত সুখবৰ । ওড়িশাৰ ভুৱনেশ্বৰত অৱস্থিত সৰ্বভাৰতীয় ফুটবল ফেডাৰেচনৰ ফিফাৰ টেলেণ্ট ফুটবল একাডেমীলৈ নিৰ্বাচিত হৈছে শিৱসাগৰৰ ৰেহান আহমেদ । অসমৰ পৰা একমাত্ৰ ফুটবলাৰ হিচাপে ১৭ বছৰ অনূৰ্ধ্ব ফুটবল খেলুৱৈ ৰেহান আহমেদ নিৰ্বাচিত হৈছে ।
উল্লেখ্য যে এই সন্মানীয় ফুটবল প্ৰশিক্ষণ শিবিৰলৈ উত্তৰ-পূব আৰু জম্মু-কাশ্মীৰ মণ্ডলৰ পৰা সৰ্বমুঠ ২০ গৰাকী খেলুৱৈ নিৰ্বাচিত হৈছে । তাৰে ভিতৰত ৰেহান হৈছে অসমৰ পৰা নিৰ্বাচিত একমাত্ৰ খেলুৱৈ । দুবাৰকৈ অনুষ্ঠিত নিৰ্বাচনী শিবিৰৰ পৰা এই ২০ গৰাকী খেলুৱৈক বাছনি কৰা হৈছে ।
উল্লেখ্য যে নিৰ্বাচিত এই ২০ গৰাকী খেলুৱৈৰ ভিতৰত অসমৰ পৰা ৰেহান একমাত্ৰ খেলুৱৈ হোৱাৰ বিপৰীতে মণিপুৰৰ পৰা ১২ গৰাকী, মিজোৰামৰ পৰা ৬ গৰাকী আৰু জম্মু-কাশ্মীৰৰ পৰা এগৰাকী খেলুৱৈ নিৰ্বাচিত হৈছে । ৰাজ্যিক পৰ্যায়ৰ খেলত ৰেহান আহমেদৰ হাফ-ভলী শ্বট ইতিমধ্যে ফুটবল বিশেষজ্ঞৰ মাজত যথেষ্ট চৰ্চিত হৈছিল ।