স্পৰ্টছ ডেস্ক,২৭ জুলাই :ফ্ৰান্সৰ প্ৰেমৰ চহৰখ্যাত পেৰিছত আৰম্ভ হৈছে বিশ্ব ক্ৰীড়া ক্ষেত্ৰৰ সৰ্ববৃহৎ প্ৰতিযোগিতা অলিম্পিক । ভাৰতৰ ১১৭ গৰাকী খেলুৱৈয়ে এই প্ৰতিযোগিতাত অংশগ্ৰহণ কৰিছে । আপুনি জানেনে, এই খেলুৱৈসকলৰ ভিতৰত আছে বিহাৰৰ এগৰাকী বিধায়িকা । বহুতে হয়তো ভাবিছে যে ৰাজনৈতিক নেতাসকলৰ বাবে অলিম্পিকত বিশেষ সংৰক্ষণৰ ব্যৱস্থা আছে নেকি ? কিন্তু প্ৰকৃতাৰ্থত তেনেকুৱা ব্যৱস্থা নাই ।
অলিম্পিকত বিহাৰৰ বিধায়িকা :
শ্ৰেয়াসী সিঙে বিহাৰৰ জামুইৰ পৰা বিধায়ক হিচাপে নিৰ্বাচিত হোৱাৰ পূৰ্বে এগৰাকী শ্বুটিং এথলীট আছিল । ক্ৰীড়া ক্ষেত্ৰত আগবঢ়োৱা অৱদানৰ বাবে তেওঁক অৰ্জুন বঁটাও প্ৰদান কৰা হৈছে । ডাবল ট্ৰেপ ইভেণ্টত ২০১৪ চনত গ্লাছগোত অনুষ্ঠিত কমনৱেলথ গেমছত তেওঁ ৰূপৰ পদক লাভ কৰাৰ সমান্তৰালকৈ ২০১৮ চনত গ'ল্ড কোষ্টত অনুষ্ঠিত প্ৰতিযোগিতাত সোণৰ পদক লাভ কৰিছিল । এইবাৰ তেওঁ পেৰিছ অলিম্পিকত ভাৰতীয় দলটোত অন্তৰ্ভুক্ত হৈছে ।
ৰাজনীতি আৰু ক্ৰীড়াত শ্ৰেয়াসী সিঙৰ সফলতা :
শ্ৰেয়াসীৰ ঘৰ বিহাৰৰ গিদাউৰত । তেওঁ দিল্লীৰ হংসৰাজ মহাবিদ্যালয়ৰ পৰা কলা শাখাত স্নাতক ডিগ্ৰী লাভ কৰিছিল । তাৰ পিচত তেওঁ ফৰিদাবাদৰ মানৱৰাচানা বিশ্ববিদ্যালয়ৰ পৰা এম বি এ কৰিছিল । শ্ৰেয়াসীয়ে ২০২০ চনৰ ৰাজ্যিক নিৰ্বাচনত বিধায়ক বিজয় প্ৰকাশৰ বিৰুদ্ধে ৪১ হাজাৰ ভোটৰ সংখ্যাগৰিষ্ঠতা লাভ কৰিছিল । তেওঁ বিহাৰৰ প্ৰাক্তন সাংসদ দিগ্বিজয় সিঙৰ কন্যা । মাতৃ পুতুল সিং বাংকা সমষ্টিৰ এগৰাকী সাংসদ । পিতৃ আৰু মাতৃ ৰাজনীতিৰ সৈতে জড়িত থকাৰ বাবে শ্ৰেয়াসীও সেই দিশতে আগ্ৰহী হৈছিল । একেদৰে ক্ৰীড়া ক্ষেত্ৰতো তেওঁ ককাদেউতাক আৰু পিতৃক অনুসৰণ কৰে । ককাদেউতাক কুমাৰে সিং আৰু পিতৃ দিগ্বিজয় দুয়োগৰাকীয়ে নেশ্যনেল ৰাইফল এছ'চিয়েচনৰ সভাপতি আছিল । সেই অনুপ্ৰেৰণাৰে শ্ৰেয়াসীয়ে শ্বুটিংত কেৰিয়াৰ গঢ়িব বিচাৰিছিল ।
অৱশ্যে, বিধায়ক হিচাপে নিৰ্বাচিত হোৱাৰ পিচত তেওঁ বেছিভাগ সময় সমষ্টিটোত থাকিবলগীয়া হৈছিল । যিহেতু তাত কোনো শ্বটগানৰ অনুশীলনৰ সুবিধা নাই, তেওঁ অনুশীলনৰ বাবে দিল্লীলৈ যাব লগা হয় । এয়া যদিও কিছু কঠিন আছিল শ্ৰেয়াসীয়ে ক্ৰীড়া আৰু ৰাজনীতি দুয়োটা ক্ষেত্ৰতে নিজৰ মনোযোগ সমানে ৰাখিছিল । যাৰ বাবে তেওঁ সঘনাই ৰে'লযাত্ৰা কৰিবলগীয়া হৈছিল । আনহাতে তেওঁ এক স্পষ্ট লক্ষ্য আৰু দৃষ্টিৰে প্ৰতিনিধিত্ব কৰা দুয়োটা ক্ষেত্ৰতে বহুতো উন্নয়ন কৰিছে । সেয়ে এতিয়া অলিম্পিকত বিধায়িকা তথা শ্বুটাৰ শ্ৰেয়াসী সিঙৰ পৰা উন্নত প্ৰদৰ্শনৰ আশা কৰিছে দেশৰ ক্ৰীড়াপ্ৰেমীয়ে ।
