শিলচৰ,21 এপ্ৰিল : নিৰ্বাচন বুলিলেই যেন জনসাধাৰণ প্ৰিয় হৈ পৰে ৰাজধানী দিল্লীৰ ৷ যাৰ সুবাদতে ৰাজ্যলৈ একপ্ৰকাৰ সোঁত ব’বলৈ ধৰে ৰাজনৈতিক ৰথী-মহাৰথীৰ ৷ লোকসভা নিৰ্বাচনৰ দ্বিতীয় আৰু তৃতীয় পৰ্যায়ৰ ভোটগ্ৰহণৰ পূৰ্বেও তেনে এক ছবি ৰাজ্যত পৰিলক্ষিত হৈছে ৷ ক্ৰমাগতভাৱে ৰাজ্যলৈ সোঁত ব’বলৈ ধৰিছে এগৰাকীৰ পৰা আনগৰাকী ৰাজনৈতিক নেতাৰ ৷
দেওবাৰে দুপৰীয়া নিৰ্বাচনী প্ৰচাৰ চলাবলৈ অসমত আহি উপস্থিত হ’ব কেন্দ্ৰীয় গৃহমন্ত্ৰী অমিত শ্বাহ ৷ শিলচৰৰ বিজেপি প্ৰাৰ্থী পৰিমল শুক্লবৈদ্যৰ হৈ নিৰ্বাচনী প্ৰচাৰত অংশগ্ৰহণ কৰিব কেন্দ্ৰীয় গৃহমন্ত্ৰীগৰাকীয়ে ৷ ইয়াৰ বাবে ইতিমধ্যে আয়োজন কৰা হৈছে এক ৰোড শ্ব’ৰ ৷ আবেলি 4 বজাত শিলচৰ চহৰৰ ডি এছ এ খেলপথাৰৰ পৰা অনুষ্ঠিত হ’বলগীয়া ৰোড শ্ব’টো চহৰৰ মাজেৰে আহি হাইৱে পইণ্টত সামৰণি পৰিব ৷ এই কাৰ্যসূচীত কেন্দ্ৰীয় মন্ত্ৰীগৰাকীক সংগ প্ৰদান কৰিব মুখ্যমন্ত্ৰী ড৹ হিমন্ত বিশ্ব শৰ্মাই ৷
অমিত শ্বাহৰ এই ৰোড শ্ব’ক কেন্দ্ৰ কৰি শিলচৰ চহৰত গঢ়ি তোলা হৈছে কটকটীয়া নিৰাপত্তা ব্যৱস্থা ৷ ইতিমধ্যে পানী নসৰকা নিৰাপত্তা ব্যৱস্থা গঢ়ি তুলিবলৈ শনিবাৰে চহৰখনত উপস্থিত হৈছে অসম আৰক্ষীৰ বিশেষ শাখাৰ সঞ্চালকপ্ৰধান হাৰমিত সিঙৰ নেতৃত্বাধীন শীৰ্ষ আৰক্ষীৰ এক বৃহৎ দল ৷