গুৱাহাটী, ১১ জুন : লোকসভা নিৰ্বাচন সামৰণি পৰাৰ পিচতে অসমত আৰম্ভ হৈছে উপ-নিৰ্বাচনৰ কুচকাৱাজ । অসমৰ ৫ গৰাকী বিধায়ক অষ্টাদশ লোকসভালৈ নিৰ্বাচিত হোৱাৰ ফলত ৫টা বিধানসভা সমষ্টিত উপ-নিৰ্বাচন অনুষ্ঠিত হোৱাটো নিশ্চিত হৈছে ।
প্ৰাক্তন বিধায়ক তথা সদ্য নিৰ্বাচিত সাংসদ ৰকিবুল হুছেইন (ETV Bharat Assam) বঙাইগাঁৱৰ বিধায়ক ফণীভূষণ চৌধুৰী, বিহালীৰ বিধায়ক ৰঞ্জিত দত্ত, চামগুৰিৰ বিধায়ক ৰকিবুল হুছেইন, ধলাই সমষ্টিৰ বিধায়ক পৰিমল শুক্লবৈদ্য আৰু চিদলী সমষ্টিৰ বিধায়ক জয়ন্ত বসুমতাৰী লোকসভালৈ নিৰ্বাচিত হোৱাৰ ফলত এই সমষ্টিকেইটাত উপ-নিৰ্বাচন অনুষ্ঠিত হোৱাৰ পথ প্ৰশস্ত হৈছে । তাৰ মাজতে সদ্যহতে চামগুৰিৰ পৰা কংগ্ৰেছৰ প্ৰাৰ্থী হিচাপে নাম উচ্চাৰিত হৈছে ৰকিবুল হুছেইনৰ পুত্ৰ তথা অসম ৰাজ্যিক এন এছ ইউ আইৰ সাধাৰণ সম্পাদক তানজিল হুছেইনৰ ।
লগতে পঢ়ক:অখিল গগৈৰ বাবেই অসমৰ তিনিখন লোকসভা সমষ্টিত উৰিল কংগ্ৰেছৰ বিজয় ধ্বজা ?
তানজিল হুছেইনৰ নাম চামগুৰিৰ পৰা কংগ্ৰেছৰ প্ৰাৰ্থী হিচাপে নাম উচ্চাৰিত হৈ থকাৰ সময়তে পুত্ৰক নিৰ্বাচনত অৱতীৰ্ণ হোৱাৰ ক্ষেত্ৰত পিতৃ ৰকিবুল হুছেইনে সেউজ সংকেত দিয়া পৰিলক্ষিত হৈছে । মঙলবাৰে গুৱাহাটীত চামগুৰিৰ বিধায়কগৰাকীৰ বিদায়ী অনুষ্ঠানতে ৰকিবুল হুছেইনে এইধৰণৰ এক সেউজ সংকেত দিয়ে ।
উল্লেখ্য যে ধুবুৰী লোকসভা সমষ্টিৰ পৰা বৃহৎ ভোটৰ ব্যৱধানত জয়লাভ কৰা কংগ্ৰেছৰ চামগুৰি বিধানসভাৰ বিধায়ক ৰকিবুল হুছেইনক আজি কংগ্ৰেছৰ বিধায়িনী দলে গুৱাহাটীত সম্বৰ্ধনা জনায় । এই অনুষ্ঠানতে সাংবাদিকক সম্বোধন কৰি ৰকিবুল হুছেইনে কয়, ‘‘দলে বিচাৰিলে নিশ্চয় মোৰ পুত্ৰই নিৰ্বাচন খেলিব । তাত মই বাধা নিদিও । তেওঁ এন এছ ইউ আই কৰিছে । কষ্ট কৰিছে । ৰাহুল গান্ধীৰ লগত মণিপুৰৰ সংঘাত পূৰ্ণ এলেকাত গৈছে । গতিকে দলে তেওঁক প্ৰাৰ্থিত্ব দিলে মোৰ আপত্তি নাই ।"
লগতে পঢ়ক:তপন কুমাৰ গগৈৰ পৰাজয়ৰ আঁৰৰ কাৰণ কি ? কি কয় যোৰহাটবাসীয়ে
ৰকিবুল হুছেইনে লগতে কয়, ‘‘ৰাজনীতি কৰাৰ পিতৃৰ পুত্ৰই ৰাজনীতি নকৰাৰ কথা নাই । কাৰণ ক্ৰিকেটাৰ পিতৃৰ পুত্ৰ ক্ৰিকেটাৰ হয় । ডাক্তৰ-ইঞ্জিনীয়াৰৰ সন্তানো ডাক্তৰ-ইঞ্জিনীয়াৰ হয় । কোনোবাই যদি সেয়া বেয়া বুলি ভাবে তাত ক’বলগীয়া নাই ।’’ উল্লেখ্য যে চামগুৰি বিধানসভা ৰকিবুল হুছেইনৰ দুৰ্গ হিচাপে পৰিচিত । ৰকিবুল হুছেইনে চামগুৰিৰ পৰা একেৰাহে পাঁচবাৰকৈ বিধায়ক হৈছে । এইটো সমষ্টি এতিয়া কাৰ হাতলৈ যায়, কংগ্ৰেছৰ প্ৰাৰ্থী কোন হয় সেয়া হ'ব লক্ষ্যণীয় ৷
লগতে পঢ়ক:লক্ষ্য ২০২৬ চনৰ নিৰ্বাচন ! মাৰ্ঘেৰিটাৰ মন্ত্ৰিত্ব, তেলীক সভাপতি পতাৰ সমীকৰণ
