গুৱাহাটী, ২৯ ফেব্ৰুৱাৰী :লোকসভা নিৰ্বাচনৰ পূৰ্বে উদুলি-মুদুলি ৰাজ্যিক বিজেপিৰ মুখ্য কাৰ্যালয় বাজপেয়ী ভৱন । এফালে ন-বিজেপিক বিজেপিৰ আদৰ্শৰ নীতি প্ৰশিক্ষণৰ কাৰ্যসূচী চলিছে । আনফালে কংগ্ৰেছক মাধমাৰ শোধাই কেইবাজনো কংগ্ৰেছীক বা কংগ্ৰেছ ত্যাগী নেতাসকলক দললৈ আদৰি অনাৰ বাবে গুৰুত্বপূৰ্ণ যোগদান কাৰ্যসূচীৰ আয়োজন কৰা হৈছে ৷ আজি বিজেপিত যোগ দিব প্ৰদেশ কংগ্ৰেছৰ সদ্য প্ৰাক্তন কাৰ্যকৰী সভাপতি ৰাণা গোস্বামীয়ে ।
সকলো জল্পনা-কল্পনাৰ অন্ত পেলাই অৱশেষত বৃহস্পতিবাৰে বিয়লি বিজেপিত যোগদান কৰিব কংগ্ৰেছৰ সদস্য পদ ত্যাগ কৰা এপিচিচিৰ প্ৰাক্তন কাৰ্যকৰী সভাপতি ৰাণা গোস্বামীয়ে ৷ কেৱল ৰাণা গোস্বামীয়েই নহয়, বিজেপিৰ ভিতৰুৱা তথ্য অনুসৰি বিজেপিলৈ মুকলি সমৰ্থন আগবঢ়োৱা এপিচিচিৰ আন এগৰাকী কাৰ্যকৰী সভাপতি কমলাক্ষ দে পুৰকায়স্থইয়ো যোগ দিব দলটোত ৷ কিন্তু ৰাণা গোস্বামীয়ে বৃহস্পতিবাৰে বিজেপিত যোগদানৰ পূৰ্ণ সম্ভাৱনা থকাৰ বিপৰীতে এতিয়াও সম্পূৰ্ণ ৰূপে স্পষ্ট নহয় পুৰকায়স্থৰ বিজেপি গমনৰ চিত্ৰনাট্য ৷
প্ৰাপ্ত তথ্য মতে বিয়লি ৩ বজাত দলটোৰ ৰাজ্যিক সভাপতি ভৱেশ কলিতাৰ উপস্থিতিত গুৱাহাটীৰ বশিষ্ঠস্থিত বাজপেয়ী ভৱনত অনুষ্ঠত হ’বলগীয়া যোগদান কাৰ্যসূচীত ৰাণা গোস্বামীয়ে বিজেপিত যোগদান কৰিব । অৱশ্যে কমলাক্ষ দে পুৰকায়স্থই কেতিয়া যোগদান কৰিব সেয়া এতিয়াও স্পষ্ট হোৱা নাই ৷ মুখ্যমন্ত্ৰী ড৹ হিমন্ত বিশ্ব শৰ্মাও এই কাৰ্যসূচীত উপস্থিত থকাৰ কথা আছে । ইফালে বৃহস্পতিবাৰৰ দিনটোত বৰপেটা জিলাত কেইবাটাও চৰকাৰী-বেচৰকাৰী কাৰ্যসূচীত ব্যস্ত হৈ আছে মুখ্যমন্ত্ৰী ড৹ হিমন্ত বিশ্ব শৰ্মা ।
অৱশ্যে বিজেপিয়ে এই প্ৰসংগত বৰ্তমানলৈ কোনোধৰণৰ তথ্য আনুষ্ঠানিকভাৱে প্ৰকাশ কৰা নাই ৷ আনহাতে বুধবাৰৰ পৰা নিজৰ ফোন বন্ধ কৰি গুৱাহাটীতে বাহৰ পাতি আছে ৰাণা গোস্বামীয়ে । অসমত ৰাহুল গান্ধীৰ ভাৰত জোড়ো ন্যায় যাত্ৰাৰ সময়ৰে পৰা কংগ্ৰেছৰ প্ৰাক্তন কাৰ্যকৰী সভাপতি ৰাণা গোস্বামী বিজেপিলৈ যাব বুলি ব্যাপক চৰ্চা চলিছিল যদিও তেওঁ সকলো কথা অস্বীকাৰ কৰি আহিছিল ৷