একাংশ অভিভাৱকে জন্মৰ পিচতে তেওঁলোকৰ সন্তানক কাণ ফুটাই দিয়ে ৷ আন একাংশই আকৌ কাণ ফুটাবৰ বাবে সন্তানটো অলপ ডাঙৰ হোৱালৈ অপেক্ষা কৰে ৷ প্ৰকৃততে, সন্তানৰ কাণ সঠিক সময়ত ফুটুৱাটো অতি গুৰুত্বপূৰ্ণ ৷ আজি এই বিষয়ে জানো আহক-
কাণ ফুটুৱাৰ উচিত সময়
শিশুৰ কাণ ফুটুৱাৰ বাবে ৩-২ বছৰৰ সময়ছোৱাক উচিত সময় বুলি গণ্য কৰা হয় ৷ কিয়নো এই বয়সত শিশুৰ ছাল সোনকালে আৰোগ্য হোৱাৰ ক্ষমতা থাকে ৷ আনহাতে, কাণ ফুটুৱাৰ সময়ত নিশ্চিত কৰিব যে শিশুটো যাতে স্বাস্থ্যৱান হয় আৰু কোনো এলাৰ্জি, সংক্ৰমণ, চৰ্দি- কাহ আদিৰ দৰে সমস্যা নাথাকে ৷ যদি আপোনাৰ সন্তানে কোনো নিৰ্দিষ্ট স্বাস্থ্য সমস্যাৰ সন্মুখীন হৈছে, তেন্তে কাণ ফুটুৱাৰ আগতে চিকিৎসকৰ পৰামৰ্শ ল'ব ৷
কাণ ক'ত ফুটাব ?
আপোনাৰ সন্তানৰ কাণ ফুটাবলৈ এজন অভিজ্ঞ তথা যোগ্য পেছাদাৰী (চিকিৎসক, নাৰ্চ, বা প্ৰশিক্ষিত কাণ ফুটুৱা ব্যক্তি)ৰ সহায় ল'ব ৷ চিকিৎসা ক্লিনিক বা চিকিৎসালয়তহে কাণ ফুটাব ৷কিয়নো সঠিক সঁজুলি আৰু অভিজ্ঞতাসম্পন্ন লোকৰ দ্বাৰা পৰিস্কাৰ-পৰিচ্ছন্নতাৰে কাণ ফুটালে সংক্ৰমণৰ আশংকা কম হয় ৷
কাণ কেনেদৰে ফুটাব লাগে ?
কাণ সাধাৰণতে দুটা পদ্ধতিত ফুটুৱা হয় ৷ এটা বেজীৰে আৰু আনটো কাণ ফুটুৱা বিশেষ বন্দুকৰে ৷ এইক্ষেত্ৰত বেজীৰে কাণ ফুটুৱাটো তুলনামুলকভাৱে ভাল বুলি গণ্য কৰা হয় ৷কিয়নো এই প্ৰক্ৰিয়াটো লেহেম আৰু অধিক নিয়ন্ত্ৰিত ৷ কাণ ফুটুৱা বন্দুকেৰে ফুটালে কাণত অধিক চাপ পৰিব পাৰে আৰু সংক্ৰমণ হোৱাৰো আশংকা থাকে ৷ আনহাতে, সকলো কাণ ফুটুৱা সঁজুলি যাতে বীজাণুমুক্ত হয়, সেইটো নিশ্চিত কৰাটো অতি গুৰুত্বপূৰ্ণ ৷ চিকিৎসকৰ পৰামৰ্শ অনুসৰি কাণ ফুটুৱাৰ আগত আপুনি এনাস্থেটিক ক্ৰীম প্ৰয়োগ কৰিব পাৰে ৷
কাণ ফুটুৱাৰ পিছত ল'বলগীয়া যত্ন
কাণ ফুটুৱাৰ পিছত কেইসপ্তাহমানৰ বাবে কাণ পৰিস্কাৰ ৰখাটো অতি গুৰুত্বপূৰ্ণ ৷ দিনত ২-৩ বাৰ এণ্টিচেপ্টিক দ্ৰৱণৰে কাণ পৰিস্কাৰ কৰিব ৷ কাণ স্পৰ্শ কৰাৰ আগতে হাত ধুব ৷ কাণত কোনো ফুলা, বিষ বা ৰঙা পৰা দেখিলে লগে লগে চিকিৎসকৰ পৰামৰ্শ ল'ব ৷ কাণ ফুটুৱাৰ পিছত কাণফুলিযোৰ ঘূৰাই থকাৰ প্ৰয়োজন নাই, এনে কৰিলে কাণখন শুকাবলৈ সময় লাগে ৷ কাণ ফুটুৱাৰ পিছত কমেও ৬-৮ সপ্তাহৰ বাবে একেযোৰ কাণফুলি পিন্ধিব যাতে ছিদ্ৰটো ভালদৰে আৰোগ্য হয় ৷
