ইণ্টাৰনেশ্যনেল ডেস্ক, ৮ জুলাই : দুদিনীয়া ৰাছিয়া ভ্ৰমণসূচীৰে সোমবাৰে মস্কোত উপস্থিত হয় প্ৰধানমন্ত্ৰী নৰেন্দ্ৰ মোদী । ৰাছিয়াৰ প্ৰথম উপ-প্ৰধানমন্ত্ৰী ডেনিছ মান্টুৰভে প্ৰধানমন্ত্ৰী মোদীক বিমানবন্দৰত আদৰণি জনায় । বিমানবন্দৰতে প্ৰধানমন্ত্ৰী মোদীক গাৰ্ড অৱ অনাৰ দিয়া হয় ।
প্ৰধানমন্ত্ৰী মোদী বিমানবন্দৰৰ পৰা মস্কোৰ হোটেল দ্য কাৰ্লটনত উপস্থিত হয় । ৰাছিয়াৰ প্ৰথম উপ-প্ৰধানমন্ত্ৰী ডেনিছ মান্টুৰভেও একেখন গাড়ীতে তেওঁৰ লগত বিমানবন্দৰৰ পৰা হোটেললৈ যায় । প্ৰধানমন্ত্ৰী মোদীক আদৰণি জনাবলৈ হোটেলৰ সমীপত উপস্থিত প্ৰবাসী ভাৰতীয়সকলক তেওঁ হাত জোকাৰি সম্ভাষণ জনায় আৰু মত বিনিময় কৰে ।
একে সময়তে মস্কোৰ হোটেলৰ বাহিৰত ৰাছিয়ান শিল্পীৰ দলে প্ৰধানমন্ত্ৰী মোদীক আদৰণি জনাই ভজন পৰিবেশন কৰে । হোটেলৰ বাহিৰত প্ৰধানমন্ত্ৰী মোদী আৰু ৰাছিয়াৰ ৰাষ্ট্ৰপতি ভ্লাদিমিৰ পুটিনৰ হাত মিলাই থকা প্ৰতিমূৰ্তি স্থাপন কৰা হৈছে ।
ৰাছিয়াত উপস্থিত হোৱাৰ পাচত প্ৰধানমন্ত্ৰী মোদীয়ে 'X'ত পোষ্ট কৰি কয়, "মস্কোত উপস্থিত হ’লো । বিশেষকৈ সহযোগিতাৰ ক্ষেত্ৰত দুয়োখন দেশৰ মাজত বিশেষ কৌশলগত অংশীদাৰিত্ব আৰু অধিক গভীৰ হোৱাৰ সম্ভাৱনা আছে । দুয়োখন দেশৰ মাজত সুদৃঢ় সম্পৰ্কই আমাৰ জনসাধাৰণক যথেষ্ট উপকৃত কৰিব ।"
মস্কোত অনুষ্ঠিত হ’বলগীয়া ২২ সংখ্যক ভাৰত-ৰাছিয়া সন্মিলনত মঙলবাৰে অনুষ্ঠিত হ’বলগীয়া আলোচনাৰ পূৰ্বে আজি নিশা প্ৰধানমন্ত্ৰী মোদীৰ লগত ব্যক্তিগত নৈশ আহাৰ গ্ৰহণ কৰিবলৈ সাজু হৈছে ৰাছিয়াৰ ৰাষ্ট্ৰপতি পুটিন ।