ইন্টাৰনেশ্যনেল ডেস্ক, ৭ অক্টোবৰ: পাকিস্তানৰ কৰাচী বিমানবন্দৰৰ বাহিৰত দেওবাৰে সংঘটিত হোৱা এক বৃহৎ বিস্ফোৰণত চীনৰ দুজন নাগৰিকসহ কেইবাজনো পাকিস্তানী নাগৰিকৰ মৃত্যু হোৱাৰ লগতে কমেও ৮ জন লোক আহত হোৱা বুলি বিষয়াসকলে জানিবলৈ দিয়ে । পাকিস্তানৰ আটাইতকৈ ডাঙৰ বিমানবন্দৰৰ বাহিৰত এখন টেংকাৰ বিস্ফোৰণ হোৱা বুলি আৰক্ষী আৰু প্ৰাদেশিক চৰকাৰে জানিবলৈ দিয়ে ।
দূতাবাসে এক বিবৃতিত কয় যে দেওবাৰে স্থানীয় সময় অনুসৰি নিশা প্ৰায় ১১ বজাত সন্ত্ৰাসবাদীয়ে দেশখনৰ দক্ষিণ সিন্ধ প্ৰদেশৰ ৰাজধানী কৰাচীৰ জিন্না আন্তঃৰাষ্ট্ৰীয় বিমানবন্দৰৰ সমীপত প’ৰ্ট কাছিম ইলেক্ট্ৰিক পাৱাৰ কোম্পানীৰ কনভয়ত আক্ৰমণ সংঘটিত কৰে । বিবৃতিটোত কোৱা হৈছে যে পাকিস্তানত থকা চীনৰ দূতাবাস আৰু কনছুলেটে এই সন্ত্ৰাসবাদী কাৰ্যক তীব্ৰ গৰিহণা দিছে, দুয়োখন দেশৰ নিহতসকলৰ প্ৰতি গভীৰ শোক প্ৰকাশ কৰিছে আৰু আহত আৰু তেওঁলোকৰ আত্মীয়ৰ প্ৰতি আন্তৰিক সমবেদনা জ্ঞাপন কৰিছে ।
বিবৃতিটোত লগতে কোৱা হয় যে চীনৰ পক্ষই পাকিস্তানী পক্ষৰ সৈতে ঘনিষ্ঠভাৱে কাম কৰি সামগ্ৰিক পৰিস্থিতিৰ সৈতে মোকাবিলা কৰি আছে । দেওবাৰে নিশা সংঘটিত হোৱা এই ভয়াবহ বিস্ফোৰণৰ পিছত বৃহৎ অগ্নিকাণ্ডই কৰাচীৰ বিমানবন্দৰৰ সমীপত কেইবাখনো বাহন আগুৰি ধৰে বুলি আৰক্ষীৰ উদ্ধৃতিৰে ছিনহুয়া সংবাদ সংস্থাই প্ৰকাশ কৰিছে ।
লগতে পঢ়ক:লেবানন-ছিৰিয়াত একেলগে শ শ পেজাৰ বিস্ফোৰণত নিহত ৮, আহত ২৭৫০ জন - Lebanon Pagers Blast
বিবৃতিটোত কোৱা হৈছে যে পাকিস্তানত চীনৰ মিছনে অতি সোনকালে জৰুৰীকালীন সঁহাৰিৰ কাম আৰম্ভ কৰিছে, পাকিস্তানে আহতসকলৰ চিকিৎসাৰ বাবে সৰ্বোচ্চ প্ৰচেষ্টা চলাব লাগিব, আক্ৰমণৰ সম্পূৰ্ণ তদন্ত কৰিব লাগিব আৰু অপৰাধীক কঠোৰ শাস্তি দিব লাগিব । দূতাবাসে জোৰ দি কয় যে পাকিস্তানত চীনৰ নাগৰিক, প্ৰতিষ্ঠান আৰু প্ৰকল্পসমূহৰ সুৰক্ষা নিশ্চিত কৰাৰ বাবে একে সময়তে পাকিস্তানী পক্ষই ব্যৱহাৰিক আৰু ফলপ্ৰসূ ব্যৱস্থা গ্ৰহণ কৰিব লাগে ।
বিবৃতিটোত কোৱা হৈছে যে পাকিস্তানত থকা চীনৰ দূতাবাস আৰু কনছুলেটসমূহে পাকিস্তানত থকা চীনা নাগৰিক আৰু কোম্পানীসমূহক সজাগ হৈ থাকিবলৈ, স্থানীয় নিৰাপত্তা পৰিস্থিতিৰ প্ৰতি তীক্ষ্ণ দৃষ্টি ৰাখিবলৈ, নিৰাপত্তা ব্যৱস্থা শক্তিশালী কৰিবলৈ আৰু সুৰক্ষাৰ সাৱধানতা অৱলম্বন কৰাৰ বাবে সকলো প্ৰচেষ্টা চলাবলৈ সোঁৱৰাই দিয়ে ।