মজিয়াত বহি খাদ্য খোৱাৰ আছে অগণন উপকাৰিতা: মেদবহুলতা হ’ব দূৰ, উন্নত হ’ব হজম শক্তি - Eating On The Floor

Health Benefits Of Eating On The Floor: মজিয়াত বহি খাদ্য খোৱাটো ভাৰতৰ এক পুৰণি পৰম্পৰা । কিন্তু আধুনিক যুগত এই পদ্ধতিৰ পৰিৱৰ্তন ঘটিছে যদিও এনেদৰে বহি খাদ্য খোৱাৰ অগণন উপকাৰিতা আছে আৰু এছিয়াৰ বিভিন্ন অঞ্চলত এতিয়াও ইয়াৰ ব্যৱহাৰ চলি আছে । আয়ুৰ্বেদে বহি খাদ্য খোৱাৰ বিষয়ে কি কয় পঢ়ক...

পুৰণি কালত, গাঁৱতেই হওক বা চহৰতেই হওক, মানুহে মজিয়াত বহি খাদ্য খাইছিল ৷ মাটিত বহি খাদ্য খোৱাটোও ধৰ্মীয়ভাৱে অতি শুভ বুলি গণ্য কৰা হয় ৷ কিন্তু, আজিকালি পৰিৱৰ্তিত সময়ৰ লগে লগে মানুহৰ খাদ্যাভ্যাস, জীৱনশৈলী আৰু সাজ-পোছাকৰ বহু পৰিৱৰ্তন হৈছে ৷

আজিকালি ডাইনিং টেবুল, চকী, চোফা আদিৰ সুবিধা লাভৰ পিছত বহুতে মজিয়াত বহি খাবলৈ ভাল নাপায় ৷ কিন্তু বিশেষজ্ঞসকলে কয় যে মজিয়াত বহি খাদ্য খোৱাৰ ফলত স্বাস্থ্যৰ বহু উপকাৰিতা সাধন হয় ৷ এই উপকাৰিতাৰ বিষয়ে যদি আপুনি এবাৰ জানি লয়, তেন্তে আপুনি নিশ্চিতভাৱে আচৰিত হৈ পৰিব ৷

মজিয়াত বহি খাদ্য খোৱাৰ বহু উপকাৰিতা আছে ৷ আয়ুৰ্বেদৰ মতে, খাদ্য খোৱাৰ সময়ত মজিয়াত বহাৰ অৰ্থ হ’ল আপুনি সুখাসন অৰ্থাৎ ভৰি ভাঁজ কৰি বহে ৷ আচলতে আমি যেতিয়া মাটিত বহি খাদ্য খাওঁ তেতিয়া ই হজম প্ৰক্ৰিয়া ক্ষীপ্ৰ কৰাত সহায় কৰে ৷

হজম শক্তিৰ বাবে ভাল:

মজিয়াত বহি খাদ্য খালে হজম শক্তি উন্নত হয় ৷ অৰ্থাৎ আমি মজিয়াত বহিলে মেৰুদণ্ড সুস্থিৰ হৈ থাকে ৷ ইয়াৰ ফলত পাচন অংগসমূহৰ ওপৰত চাপ কমি যায় ৷ ইয়াৰ ফলত খাদ্য হজম কৰাত সহজ হয় ৷ লগতে বিশেষজ্ঞসকলে কয় যে, ইয়াৰ ফলত বদহজম আৰু গেছৰ দৰে পাচনতন্ত্ৰৰ সমস্যাৰ পৰাও পৰিত্ৰাণ পাব পাৰি ৷ ২০১৬ চনত ‘জাৰ্নেল অৱ নিউট্ৰিচন এণ্ড মেটাবলিজম’ত প্ৰকাশিত এক গৱেষণাত গৱেষকসকলে এই তথ্য লাভ কৰে যে মজিয়াত বহি খাদ্য খোৱাৰ ফলত হজম শক্তি উন্নত হয় ৷ ইৰাণৰ তেহৰাণ চিকিৎসা বিজ্ঞান বিশ্ববিদ্যালয়ৰ পুষ্টি আৰু খাদ্য বিজ্ঞান বিভাগৰ অধ্যাপক ‘ড৹ শ্বাহীন ঘৰৱীয়ে’ এই অধ্যয়নত অংশ লৈছিল ৷

ওজন কমোৱাত ফলপ্ৰসূ

বিশেষজ্ঞসকলে কয় যে, ডাইনিং টেবুলত বহি খাদ্য খোৱাটোৱে ওজন বৃদ্ধি কৰিব পাৰে ৷ ইয়াৰ বিপৰীতে কোৱা হয় যে মজিয়াত বহি খাদ্য খালে মগজুৱে সংকেট লাভ কৰে যে পেট ভৰি গৈছে আৰু কমকৈ খাদ্য খাবলৈ সংকেত দিয়ে ৷ ইয়াৰ বাবে আমি খাদ্য কম খাওঁ, আৰু আমাৰ ওজনো নিয়ন্ত্ৰণত থাকে ৷

ৰক্ত সঞ্চালন উন্নত হয়

মজিয়াত বহি খাদ্য খালে ভৰিৰ ৰক্ত সঞ্চালন উন্নত হয় ৷ বিশেষজ্ঞসকলে কয় যে, ইয়াৰ ফলত ভৰিৰ বিষ আৰু কঁকালৰ বিষ কমি যায় ৷

মানসিক চাপ কম কৰে

মজিয়াত বহি খাদ্য খালে মানসিক চাপ আৰু উদ্বেগ কম হয় ৷ এই সুখাসনে আপোনাক মানসিক শান্তি প্ৰদান কৰে যি আমি ধ্যান আৰু যোগাসন কৰি লাভ কৰিব পাৰো ৷ মজিয়াত বহিলে মেৰুদণ্ড পোন কৰি ৰাখি আমি দীঘলকৈ উশাহ লওঁ ৷ ইয়াৰ ফলত মানসিক চাপো কম হয় ৷

সতৰ্কীকৰণ: প্ৰিয় পাঠক, আমাৰ প্ৰতিবেদন পঢ়াৰ বাবে ধন্যবাদ ৷ এই খবৰটো কেৱল আপোনালোকক সজাগ কৰাৰ উদ্দেশ্যে লিখা হৈছে ৷ আমি এই প্ৰতিবেদনত ঘৰুৱা উপায় আৰু সাধাৰণ তথ্যৰ সহায় লৈছো ৷ কিন্তু প্ৰিয় পাঠক, যদি আপুনি যিকোনো বাতৰিতে স্বাস্থ্যৰ সৈতে জড়িত কিবা পঢ়ে, তেন্তে এই পদ্ধতি গ্ৰহণ কৰাৰ আগতে নিশ্চিতভাৱে চিকিৎসকৰ পৰামৰ্শ ল’বলৈ নাপাহৰিব ৷

লগতে পঢ়ক:চিৰি বগোৱা নে দৌৰা ? ওজন কমাবৰ বাবে কোনটো উত্তম - Stairs vs Running