ইন্টাৰনেশ্যনেল ডেস্ক, 20 এপ্ৰিল: শৰীৰৰ গুৰুত্বপূৰ্ণ কাম-কাজসমূহ সূচাৰুৰূপে চলি থাকিবলৈ যকৃতৰ যত্ন লোৱাতো অতিকৈ প্ৰয়োজন ৷ কিয়নো কেতিয়াবা যকৃতৰ গুৰুত্বপূৰ্ণ বিসংগতি ধৰা পৰিলে ব্যক্তিয়ে অস্ত্ৰোপচাৰ নাইবা সংৰোপন কৰিবলগাও হ’ব পাৰে ৷
এইবেলি বিশ্ব যকৃত দিৱসৰ লগত সংগতি ৰাখি আয়োজিত এক অনুষ্ঠানত অংশগ্ৰহণ কৰি এগৰাকী আগশাৰীৰ চিকিৎসকে কয় যে, যকৃতৰ ৰোগ এগৰাকী ব্যক্তিৰ বাবে ঘাতকত পৰিণত হ’ব পাৰে ৷ ৷ জনসাধাৰণৰ মাজত যকৃত সম্পৰ্কীয় ৰোগসমূহৰ সজাগতা সৃষ্টিৰ অৰ্থে প্ৰতিবছৰে 19 এপ্ৰিলৰ দিনটো বিশ্ব যকৃত দিৱস হিচাপে পালন কৰি অহা হৈছে ৷
দেখা গৈছে যে, কিশোৰৰ পৰা আৰম্ভ কৰি যুৱচামৰ মাজত অতি উদ্বেগজনকভাৱে বৃদ্ধি পাব ধৰিছে ফেটি লিভাৰৰ দৰে ৰোগসমূহ ৷ চিকিৎসকৰ মতে, বিলাসিতাপূৰ্ণ জীৱনশৈলী, অস্বাস্থ্যকৰ পৰিৱেশত প্ৰস্তুত কৰা জাংক ফুড, অত্যধিক মদ্যপান, অসুৰক্ষিত চিকিৎসা পদ্ধতি যেনে : কেইবাবাৰো ব্যৱহাৰ কৰা বেজী আদিয়ে এই ৰোগ সৃষ্টিত ইন্ধন যোগাইছে ৷ বিশ্বৰ এখন আগশাৰীৰ চিকিৎসালয়ৰ এগৰাকী হৃদৰোগ বিশেষজ্ঞই জানিবলৈ দিয়া অনুসৰি, যকৃতৰ ৰোগৰ বিষয়ে জানিবলৈ হ’লে নিয়মিতভাৱে ইয়াৰ পৰীক্ষা-নিৰীক্ষা কৰি থকাটো আৱশ্যক ৷
ভাৰতৰ দৰে দেশসমূহত সৰ্বসাধাৰণ লোকৰ মৃত্যুৰ অন্যতম দহটা কাৰণৰ ভিতৰত এটা যকৃতৰ ৰোগ বুলি ইতিমধ্যেই বিশ্ব স্বাস্থ্য সংস্থাই সদৰী কৰিছে ৷ প্ৰায়ে এই ৰোগত ভূগি থকা লোকৰ শৰীৰত প্ৰথমাৱস্থাত কোনো লক্ষণে দেখা নিদিয়ে ৷ যাৰবাবে পৰৱৰ্তী সময়ত ৰোগে জটিল পৰ্যায় পায় ৷
শ্ৰী বালাজী এক্সন চিকিৎসা প্ৰতিষ্ঠানৰ গেষ্ট্ৰ’এণ্ট’ৰ’লজী আৰু হেপেট’লজীৰ মুখ্য বিশেষজ্ঞ চিকিৎসক ডাঃ মণিকা জৈনে প্ৰকাশ কৰা মতে, চকু আৰু ছাল শেতাপৰাৰ লগতে ইষৎ হালধীয়া হ’লে সেয়া যকৃতৰ ৰোগৰ প্ৰাৰম্ভিক লক্ষণ বুলিব পাৰি ৷ ইয়াৰোপৰি ব্যক্তিৰ শৰীৰত খজুৱতি, পেটত তৰল পদাৰ্থ জমা হোৱা বাবে পেট ফুলা, ভোক নলগা, ভৰি ফুলা আদি লক্ষণো ফেটি লিভাৰৰ দৰে সমস্যাৰ একো একোটা কাৰণ ৷ এই লক্ষণসমূহ শৰীৰত দেখা দিলে শীঘ্ৰে চিকিৎসকৰ পৰামৰ্শ গ্ৰহণ কৰা উচিত ৷