হোজাই: হোজাই জিলাৰ লামডিঙত সোমবাৰে এক শোকাবহ পথ দুৰ্ঘটনা সংঘটিত হয় ৷ এই পথ দুৰ্ঘটনাত এগৰাকী বিদেশী মহিলা পৰ্যটক নিহত হয় । নিহত বিদেশী পৰ্যটকগৰাকী এলেনা বেৰি থমচন বুলি চিনাক্ত কৰা হৈছে ৷ এলেনা বেৰি থমচন আমেৰিকাৰ নাগৰিক । এখন মালবাহী ট্ৰাকৰ খুন্দাত নিহত হয় বিদেশী পৰ্যটক মহিলাগৰাকী ৷ লামডিং-হাফলং সংযোগী ২৭ নং ৰাষ্ট্ৰীয় ঘাইপথৰ কাষৰ ব্লুহিল ধাবাৰ সন্মুখত সংঘটিত হৈছিল উক্ত পথ দুৰ্ঘটনাটো ।
দুৰ্ঘটনা সংঘটিত হোৱাৰ পাছতেই ঘটনাস্থলীত উপস্থিত স্থানীয় লোকে আৰক্ষীক ঘটনাৰ বিষয়ে অৱগত কৰে ৷ লগে লগে ঘটনাস্থলীত লামডিং আৰক্ষীৰ লগতে মান্দাৰ দিচা আৰক্ষী উপস্থিত হৈ বিদেশী পৰ্যটকগৰাকীক সংকটজনক অৱস্থাত উদ্ধাৰ কৰে আৰু চিকিৎসাৰ বাবে তেওঁক লামডিং অসামৰিক চিকিৎসালয়লৈ প্ৰেৰণ কৰে ৷ কিন্তু লামডিং অসামৰিক চিকিৎসালয়ত উপস্থিত হোৱাৰ পাছতেই চিকিৎসকে বিদেশী মহিলা পৰ্যটকগৰাকীক মৃত ঘোষণা কৰে ৷
লামডিং আৰক্ষী থানাৰ বিষয়াই জানিবলৈ দিয়া মতে, বিদেশী পৰ্যটকগৰাকীয়ে ৰয়েল এনফিল্ড হিমালয়ান বাইকেৰে লামডিঙৰ পৰা হাফলঙৰ অভিমুখে গৈ থকা সময়তে এই দুৰ্ঘটনাটো সংঘটিত হয় । জানিব পৰা মতে, অশোক লিলেন কোম্পানীৰ এখন মালবাহী ট্ৰাকে বাইকখনত খুন্দা মাৰে ৷ দুৰ্ঘটনাটো সংঘটিত কৰি উক্ত ট্ৰাকখন ঘটনাস্থলীৰ পৰা পলায়ন কৰে ।
দুৰ্ঘটনাগ্ৰস্ত ৰয়েল এনফিল্ড হিমালয়ান বাইকখনৰ পঞ্জীয়ন নম্বৰ AS 11 N 0804 ৷ সম্প্ৰতি আৰক্ষীয়ে এই দুৰ্ঘটনাৰ তদন্ত অব্যাহত ৰাখিছে ৷ ইয়াৰ লগতে আৰক্ষীয়ে দুৰ্ঘটনা সংঘটিত কৰা ট্ৰাকখনৰ লগতে চালকক বিচাৰি তদন্ত অব্যাহত ৰাখিছে ৷
অধিক তথ্যৰ বাবে অপেক্ষা কৰা হৈছে ৷
লগতে পঢ়ক: কেইদিনমান আগতে ভাল খবৰ পাইছিলহে ! মুহূৰ্ততে থানবান হৈ পৰিল এটা পৰিয়ালৰ সপোন
