চিটাৰা ডেস্ক, 12 আগষ্ট: 77 তম লোকাৰ্নো চলচ্চিত্ৰ মহোৎসৱত শনিবাৰে উপস্থিত আছিল বলীউডৰ ছুপাৰষ্টাৰ শ্বাহৰুখ খান ৷ কিং খানৰ সৈতে একেলগে উপস্থিত থাকে কন্যা সুহানা খানৰ লগতে বলীউডৰ তাৰকা অভিনেতা অভিষেক বচ্চন ৷ এই মহোৎসৱতে শ্বাহৰুখ খানলৈ আগবঢ়োৱা হয় পাৰ্ডো আল্লা কেৰিয়াৰা বা কেৰিয়াৰ লেপ'ৰ্ড হিচাপে জনাজাত জীৱনজোৰা কৃতিত্ব বঁটা ৷
লোকাৰ্নো চলচ্চিত্ৰ মহোৎসৱৰ শৈল্পিক পৰিচালক জিঅ’না এ নাজজাৰোৰ সৈতে হোৱা এক সাক্ষাৎকাৰৰ সময়ত তাৰকা অভিনেতাগৰাকীয়ে তেওঁৰ চলচ্চিত্ৰ কেৰিয়াৰ আৰু ছবিৰ বাছনিৰ চৰ্তৰ বিষয়ে আলোচনা কৰিছিল ৷ অতি কম সময়ৰ ভিতৰতে মুক্তি লাভ কৰিব শ্বাহৰুখ খান অভিনীত ছবি কিং ৷ এই কথোপকথনৰ জৰিয়তে বলীউডৰ অভিনেতাগৰাকীয়ে কিং ছবিখনৰ লগতে নিৰ্মাণৰ সৈতে জড়িত বহুকথাই মুকলিকৈ প্ৰকাশ কৰে ৷
"কিছু প্ৰকাৰৰ চলচ্চিত্ৰ আছে, যিবোৰ মই কৰিব বিচাৰো ৷ হয়তো ই অধিক বয়সকেন্দ্ৰিক ৷ মই 6-7 বছৰ ধৰি কিবা এটা চেষ্টা কৰিব বিচাৰো, মই ইয়াৰ বিষয়ে চিন্তা কৰি আছোঁ আৰু আমি বহি থাকোতে এদিন সুজয়ক এইটো প্ৰকাশ কৰিছিলো ৷ তেওঁ আমাৰ কাৰ্যালয়ত আমাৰ সৈতে কাম কৰে, তেওঁ আমাৰ বাবে কিছুসংখ্যক চলচ্চিত্ৰ নিৰ্মাণ কৰিছে ৷ তেওঁ কয়, মহাশয়, মোৰ এটা বিষয় আছে," এনেদৰে সাক্ষাৎকাৰৰ সময়ত এছ আৰ কে বৰ্ণনা কৰে ৷