হায়দৰাবাদ :ইণ্ডিয়াজ গট লেটেণ্টৰ এটা খণ্ডত অশালীন মন্তব্য কৰাৰ বাবে ৰাজহুৱাভাৱে ক্ষমা বিচৰাৰ পিছতো জনপ্ৰিয় ইউটিউবাৰ আৰু পডকাষ্টাৰ ৰণবীৰ এলাহবাদিয়া তীব্ৰ প্ৰতিক্ৰিয়াৰ সন্মুখীন হৈছে । বহু ছ’চিয়েল মিডিয়া ব্যৱহাৰকাৰীয়ে তেওঁৰ ক্ষমাপ্ৰাৰ্থনা নাকচ কৰি তেওঁৰ বিৰুদ্ধে অভিযোগ উত্থাপন কৰিছে যে এই ঘটনা তেওঁৰ জিভাৰ পিছলি পৰি হোৱা ঘটনা নহয় বৰঞ্চ এটা ইংৰাজী শ্ব’ৰ পৰা অনুপ্ৰাণিত হৈ তেওঁ এই বিতৰ্কিত কথা কৈছিল । এই বিতৰ্কিত ঘটনাই তীব্ৰ ক্ষোভৰ সৃষ্টি কৰিছে, নেটিজেনসকলে কঠোৰ পৰিণামৰ দাবী জনাইছে ।
দৰ্শকে এলাহবাদিয়াৰ এই মন্তব্যক অশিষ্টাচাৰী বুলি অভিহিত কৰি কমেডিৰ সময় ৰাইনাৰ সৈতে সামাজিক মাধ্যমত দুয়োকে থকা-সৰকা কৰিছে । এই খণ্ডত যোগদান কৰিছিল ইউটিউবাৰ আশীষ চাঞ্চলানী আৰু অপূৰ্বা মুখিজাই । এলাহবাদিয়াই এই চাঞ্চল্যকৰ ভাষ্য এজন প্ৰতিযোগীৰ বাবে এৰিছিল ৷ তেওঁৰ প্ৰশ্নৰ পাছত আনকি আয়োজক সময় ৰাইনাকো কিছু অস্বস্তিকৰ যেন দেখা গৈছিল ।
এই প্ৰতিক্ৰিয়াৰ পিছতে এলাহবাদিয়াই ছ’চিয়েল মিডিয়াত এক মিনিটৰ ভিডিঅ’ পোষ্ট কৰি দুখ প্ৰকাশ কৰি নিজৰ ভুল স্বীকাৰ কৰে । এক্সত ভিডিঅ’টো শ্বেয়াৰ কৰি তেওঁ কেপশ্যনত লিখিছে, "ইণ্ডিয়াজ গট লেটেণ্টত মই যি ক'লোঁ সেয়া মই কোৱা উচিত নাছিল । মই দুঃখিত ।"
তেওঁ ক্ষমা বিচৰাৰ পিছতো অসন্তুষ্ট হৈ থাকিল ছ’চিয়েল মিডিয়া ব্যৱহাৰকাৰীসকল । বহুতে অভিযোগ উত্থাপন কৰে যে এলাহবাদিয়াই ইচ্ছাকৃতভাৱে এটা চিত্ৰনাট্যৰ অংশ হিচাপে এই আপত্তিজনক মন্তব্য কৰিছে ।