গুৱাহাটী, 17 অক্টোবৰ : চলিত বৰ্ষৰ শেষৰ ভাগলৈ অৰ্থাৎ নৱেম্বৰ মাহৰ 15 তাৰিখে মুক্তি লাভ কৰিব নতুন অসমীয়া ছবি ‘অভিমন্যু’ এ । শ্বৱনম এণ্টাৰটেইনমেণ্টৰ বেনাৰত নিৰ্মাণ কৰা এই নতুন অসমীয়া ছবিখনৰ পৰিচালনা অচিন্ত্য শংকৰৰ । কিছুদিন পূৰ্বে ছবিখনৰ পোষ্টাৰ, মোশ্যন পোষ্টাৰ আৰু ছবিখনৰ আইটেম গীতটি মুক্তি দিয়াৰ পাছতে শেহতীয়াকৈ মুক্তি দিয়া হৈছে ছবিখনৰ দ্বিতীয়টো গীত 'ভালপোৱা হৈ বাজিছো ।'
জয়ন্ত হাজৰিকা অৰ্থাৎ অসমবাসীৰ মৰমৰ ৰাণা দাৰ মৃত্যুবাৰ্ষিকীৰ দিনটোতেই মুক্তি দিয়া হয় এই নতুন অসমীয়া গীতটি । গীতটিৰ মুক্তিৰ পাছতে এতিয়া সমাজিক মাধ্যমত যথেষ্ট সমাদৰ লাভ কৰা পৰিলক্ষিত হৈছে । গীতটিত কণ্ঠদান কৰিছে অংগৰাগ পাপন মহন্ত আৰু ভাস্বতী ভাৰতীয়ে । গীতটিৰ কথা, সুৰ আৰু সংগীত দিগন্ত ভাৰতীৰ । ছ’চিয়েল মিডিয়াৰ সমাদৰে দেখুৱাইছে যে ‘ভালপোৱা হৈ বাজিছো’ দিগন্ত ভাৰতীৰ অন্যতম মাষ্টাৰপিছ । গীতটিৰ সংগীত ব্যৱস্থাপনা পলাশ সূৰ্য্য গগৈৰ ।