নেশ্যনেল ডেস্ক,২৭ ছেপ্টেম্বৰ :উত্তৰাখণ্ডত চাঞ্চল্যকৰ নিৰুদ্দেশৰ ঘটনা সংঘটিত হৈছে । সন্দেহজনক পৰিস্থিতিত এগৰাকী ছাত্ৰ সন্ধানহীন হোৱাৰ তথ্য পোহৰলৈ আহিছে । ছাত্ৰজন পুহানাৰ আৰ আই টি মহাবিদ্যালয়ত বিটেক কম্পিউটাৰ বিজ্ঞানৰ তৃতীয় বৰ্ষত অধ্যয়নৰত কৰি আছিল আৰু অসমৰ বাসিন্দা আছিল । অভিযোগৰ পিছতে আৰক্ষীয়ে নিৰুদ্দেশ সম্পৰ্কীয় এটা গোচৰ ৰুজু কৰিছে আৰু সন্ধানহীন ছাত্ৰজনক বিচাৰি অভিযান আৰম্ভ কৰিছে ।
অসমৰ ছাত্ৰ নিৰুদ্দেশ
গংনাহাৰ কোটৱালীৰ ভাৰপ্ৰাপ্ত পৰিদৰ্শক ঐশ্বৰ্য পালে ঘটনা সন্দৰ্ভত কয় যে সন্ধানহীন নিশান অসমৰ বাসিন্দা । তেওঁ তেওঁৰ বন্ধুৰ সৈতে গংনাহাৰ কোটৱালী অঞ্চলৰ আজাদ নগৰ অঞ্চলত বাস কৰে আৰু পুহানাৰ আৰ আই টি মহাবিদ্যালয়ৰ তৃতীয় বৰ্ষৰ বিটেক কম্পিউটাৰ বিজ্ঞানৰ ছাত্ৰ । আৰক্ষী বিষয়াগৰাকীৰ মতে ২২ ছেপ্টেম্বৰত তেওঁ বন্ধুবৰ্গক অৱগত নকৰাকৈ সন্ধিয়া কোনো অজ্ঞাত স্থানলৈ ৰাওনা হৈছিল । তেতিয়াৰে পৰা ছাত্ৰজনৰ কোনো সন্ধান নাই । আৰক্ষীৰ মতে তেওঁৰ বন্ধুসকলে বিচাৰিছে যদিও এতিয়ালৈ ছাত্ৰজনৰ কোনো সম্ভেদ ওলোৱা নাই ।