নতুন দিল্লী : দেশৰ ৰাজধানী চহৰ নতুন দিল্লীত বায়ু প্ৰদূষণে ভয়ংকৰ ৰূপ ধাৰণ কৰিছে । প্ৰদূষণ ইমানে ভয়াৱহ হৈ পৰিছে যে চৰকাৰে কৰ্মচাৰীসকলৰ বাবে বিশেষ পদক্ষেপ ল'বলৈ সিদ্ধান্ত লৈছে । প্ৰদূষণ নিয়ন্ত্ৰণৰ বাবে দিল্লী চৰকাৰে 'ৱৰ্ক ফ্ৰম হোম' অৰ্থাৎ চৰকাৰী কাৰ্যালয়ৰ কৰ্মচাৰীয়ে ঘৰৰ পৰাই কাম কৰিব লাগিব । চৰকাৰৰ সিদ্ধান্ত অনুসৰি ৫০ শতাংশ কৰ্মচাৰীয়ে ঘৰৰ পৰাই কাম কৰিব । ইয়াৰ কাৰ্যকৰীকৰণৰ বাবে বুধবাৰে সচিবালয়ত বিষয়াসকলৰ সৈতে এখন গুৰুত্বপূৰ্ণ বৈঠক অনুষ্ঠিত হ'ব । দিল্লীৰ পৰিৱেশ মন্ত্ৰী গোপাল ৰায়ে এক্সৰ এটা পোষ্টত এই কথা প্ৰকাশ কৰিছে ।
প্ৰদূষণ নিয়ন্ত্ৰণৰ পদক্ষেপ
ইয়াৰ পূৰ্বে, দিল্লী চৰকাৰে প্ৰদূষণ নিয়ন্ত্ৰণ কৰিবলৈ চৰকাৰী কাৰ্যালয় খোলা আৰু বন্ধ কৰাৰ সময়ো সলনি কৰিছে । দিল্লী পৌৰ নিগমৰ (এমচিডি) কাৰ্যালয় পুৱা ৮:৩০ বজাৰ পৰা সন্ধিয়া ৫ বজালৈ খোলা হৈছে । কেন্দ্ৰীয় চৰকাৰৰ কাৰ্যালয়সমূহো পুৱা ৯ বজাৰ পৰা সন্ধিয়া ৫:৩০ বজালৈ খোলা হৈছে । দিল্লীৰ চৰকাৰী কাৰ্যালয়সমূহ পুৱা ১০ বজাৰ পৰা সন্ধিয়া ৬:৩০ বজালৈ খোলাৰ ব্যৱস্থা কৰা হৈছে ।