ৰামলীলাত চৰিত্ৰ ৰূপায়নৰ মাজতেই চিৰদিনৰ বাবে শুই পৰিল কুম্ভকৰ্ণ

Ramlila in Delhi: ৰামলীলাত ভাও দি থকাৰ সময়তে হঠাৎ অসুস্থ হৈ মৃত্যুক সাৱতিলে এগৰাকী শিল্পীয়ে ৷ কুম্ভকৰ্ণৰ ভাও দিছিল শিল্পীগৰাকীয়ে ৷

নিউজ ডেস্ক, 13 অক্টোবৰ: দেশজুৰি শনিবাৰে উদযাপন কৰা হয় দশেৰা ৷ লংকাধিপতি ৰাৱণৰ পুত্তলিকা দাহ কৰি সমাজৰ পৰা অপশক্তি নাশৰ বাবে কামনা কৰে সকলোৱে ৷ দেশৰ ৰাজধানী দিল্লীতো দেখা গৈছে দশেৰা উপলক্ষে ৰামলীলাৰ ব্যাপক আয়োজন ৷ কিন্তু এই উদযাপনৰ মাজতে সংঘটিত হয় এক শোকাৱহ ঘটনা ৷ মঞ্চত কুম্ভকৰ্ণৰ ভাও দি চিৰনিদ্ৰাত শুই পৰিল এগৰাকী শিল্পী ৷ দক্ষিণ দিল্লীত শুকুৰবাৰে নিশা অনুষ্ঠিত ৰামলীলাৰ অনুষ্ঠানত এই ঘটনা সংঘটিত হোৱা বুলি আৰক্ষীয়ে জনাইছে ৷

পশ্চিম বিহাৰৰ নিবাসী বিক্ৰম তনেজা নামৰ 60 বছৰীয়া শিল্পীগৰাকীয়ে মালব্য নগৰৰ সাবিত্ৰী নগৰ ৰামলীলা অনুষ্ঠানত কুম্ভকৰ্ণৰ ভাও দি আছিল ৷ তেতিয়াই তেওঁ বুকুত তীব্ৰ বিষ অনুভৱ কৰে ৷ তেওঁক আকাশ হাস্পতাললৈ লৈ যোৱা হয় যদিও তেওঁক পি এছ আৰ আই হাস্পতাললৈ উন্নত চিকিৎসাৰ বাবে প্ৰেৰণ কৰা হয় ৷ শনিবাৰে চিকিৎসাধীন অৱস্থাতে তেওঁৰ মৃত্যু ঘটে ৷

এগৰাকী আৰক্ষী বিষয়াই কয় বিক্ৰমৰ মৃত্যু হৃদযন্ত্ৰৰ ক্ৰিয়া বন্ধ হোৱাৰ ফলতে ঘটিছে ৷ তেওঁ লগতে কয় যে পৰিয়ালৰ সদস্যৰ বক্তব্য ৰেকৰ্ড কৰা হৈছে আৰু কোনো অভিযোগ উত্থাপন হোৱা নাই ৷

কেইদিনমান পূৰ্বে শাহদৰা জিলাৰ বিশ্বকৰ্মা নগৰতো ৰামলীলা মঞ্চায়নৰ সময়ত একগৰাকী শিল্পীৰ মৃত্যু ঘটিছিল ৷ তেওঁ ৰামলীলাত শ্ৰীৰামচন্দ্ৰৰ ভাও দিছিল ৷ মৃত শিল্পীগৰাকী 45 বছৰীয়া সুশীল কৌশিক বুলি জানিব পৰা গৈছে ৷ তেওঁ বিশ্বকৰ্মা নগৰৰ স্থানীয় বাসিন্দা আছিল ৷ পেছাত তেওঁ এগৰাকী সম্পত্তিৰ ব্যৱসায়ী আছিল ৷

আচলতে মঞ্চত শিল্পীসকলে ৰামলীলা প্ৰদৰ্শন কৰি আছিল ৷ তেনেতে সুশীল কৌশিকৰ স্বাস্থ্যৰ অৱনতি ঘটে ৷ তাৰ পাচত তেওঁক চিকিৎসালয়লৈ লৈ যোৱা হয় ৷ কিন্তু চিকিৎসকে শিল্পীগৰাকীক মৃত ঘোষণা কৰে ৷ তেওঁৰ মৃত্যুও হৃদ ক্ৰিয়া বন্ধ হোৱাৰ ফলতে ঘটা বুলি চিকিৎসকে উল্লেখ কৰে ৷ ভিডিঅ’ত দেখা গৈছিল যে ৰামৰ ভাও দি থকা অৱস্থাত তেওঁ হঠাৎ পিচুৱাই গৈ ঢলি পৰে ৷

লগতে পঢ়ক:‘‘অসত্যৰ জয় হ’বই, অন্যায়ৰ জয় হোৱাতো নিশ্চিত’’- কিয় ক’লে মুখ্যমন্ত্ৰী আতিশীয়ে ?