নেশ্যনেল ডেস্ক,১৭ আগষ্ট :ঝাৰখণ্ডৰ হাজৰিবাগত এগৰাকী আৰক্ষীৰ হত্যাকাণ্ডক লৈ উত্তেজনা অব্যাহত আছে । তাৰ মাজতে ৰাজ্যখনত উপস্থিত হৈ অসমৰ মুখ্যমন্ত্ৰী ড৹ হিমন্ত বিশ্ব শৰ্মাই ঝাৰখণ্ড চৰকাৰক তীব্ৰ সমালোচনা কৰে । ঝাৰখণ্ড বিধানসভা নিৰ্বাচনৰ বাবে বিজেপিয়ে সহ-প্ৰভাৰীৰ দায়িত্বত দিয়া অসমৰ মুখ্যমন্ত্ৰীগৰাকীয়ে দেওঘৰ বিমানবন্দৰত উপস্থিত হৈ হেমন্ত ছোৰেন চৰকাৰক লক্ষ্য কৰি লয় ।
উল্লেখ্য যে যোৱা ১১ আগষ্টত হাজৰিবাগ চিকিৎসা মহাবিদ্যালয়ত চৌহান হেমব্ৰম নামৰ এগৰাকী আৰক্ষীক দুৰ্বৃত্তই হত্যা কৰিছিল । জানিব পৰা মতে হত্যাকাৰী পলাতক হৈ আছে । আৰক্ষীয়ে এতিয়ালৈ অভিযুক্তক গ্ৰেপ্তাৰ কৰিবলৈ সক্ষম হোৱা নাই ।
ঝাৰখণ্ড চৰকাৰক সমালোচনা অসমৰ মুখ্যমন্ত্ৰীৰ :
ইফালে ঝাৰখণ্ডত উপস্থিত হৈ অসমৰ মুখ্যমন্ত্ৰীগৰাকীয়ে কয়, "মই আজি হাবিলদাৰ চৌহান হেমব্ৰমৰ পৰিয়ালৰ সদস্যসকলক সাক্ষাৎ কৰিবলৈ গিৰিদিহলৈ গৈ আছো । এই ঘটনাটো মৰ্মান্তিক আৰু ঝাৰখণ্ডত জনজাতীয় লোকসকল সুৰক্ষিত নহয় ।" ৰাজ্য চৰকাৰক আক্ৰমণ কৰি তেওঁ কয়, "ভুক্তভোগীৰ পৰিয়ালক চৰকাৰী পক্ষই সাক্ষাৎ কৰিবলৈ যোৱা নাই বা অপৰাধীক ধৰিবলৈ কাম কৰা নাই । চৰকাৰৰ এই মনোভাৱে দেখুৱাই যে ঝাৰখণ্ডৰ হেমন্ত চৰকাৰে তোষণৰ ৰাজনীতি কৰিবলৈ বাধ্য হৈছে ।"
অসমৰ মুখ্যমন্ত্ৰী তথা ঝাৰখণ্ডৰ বিজেপিৰ সহ-প্ৰভাৰী ড৹ হিমন্ত বিশ্ব শৰ্মাই কয় যে ঝাৰখণ্ড চৰকাৰে তোষণৰ ৰাজনীতি কৰি আছে । যদি চৰকাৰে জনজাতীয় লোকসকলক লৈ চিন্তিত আৰু তেওঁলোকৰ স্বাৰ্থত কাম কৰিলেহেঁতেন তেনেহ'লে অপৰাধী আজি আৰক্ষীৰ হাতত থাকিলহেঁতেন বুলিও তেওঁ দাবী কৰে । তেওঁৰ মতে চৰকাৰে কেৱল লাভালাভৰ প্ৰতি লক্ষ্য ৰাখি ৰাজনীতি কৰি আছে, যাৰ বাবে ঘটনাৰ অভিযুক্ত এতিয়াও পলাতক হৈয়ে আছে ।