নতুন দিল্লী : ২০২১ চনৰ ৮ ডিচেম্বৰত এম আই-১৭ ভি৫ হেলিকপ্টাৰ দুৰ্ঘটনাত দেশৰ প্ৰথমগৰাকী চীফ অৱ ডিফেন্স ষ্টাফ জেনেৰেল বিপিন ৰাৱাটৰ মৃত্যু হয় । তেওঁৰ মৃত্যু তথা দুৰ্ঘটনাটো কেনেদৰে সংঘটিত হৈছিল সেই বিষয়ে তদন্ত কৰিবলৈ পৰৱৰ্তী সময়ত এখন সংসদীয় সমিতি গঠন কৰা হয় । এই সংসদীয় পেনেলৰ প্ৰতিবেদন প্ৰকাশ পাইছে । প্ৰতিবেদনত কোৱা হৈছে যে সেইদিনা সংঘটিত দুৰ্ঘটনাটোৰ কাৰণ আছিল 'মানৱ ত্ৰুটি' ।
তেওঁলোকে যাত্ৰা কৰি থকা সামৰিক হেলিকপ্টাৰখন তামিলনাডুৰ কুনুৰৰ ওচৰত দুৰ্ঘটনাগ্ৰস্ত হোৱাৰ ফলত জেনেৰেল ৰাৱাট, তেওঁৰ পত্নী মধুলিকা ৰাৱাট আৰু আন কেইবাজনো জোৱানৰ মৃত্যু হৈছিল ।
এই দুৰ্ঘটনাটো সংবাদ মাধ্যমত ব্যাপকভাৱে প্ৰচাৰ হৈছিল । ইফালে মঙলবাৰে সংসদত উত্থাপন কৰা প্ৰতিবেদনত প্ৰতিৰক্ষা বিভাগৰ স্থায়ী সমিতিয়ে ত্ৰয়াদশ প্ৰতিৰক্ষা পৰিকল্পনাৰ সময়ছোৱাত সংঘটিত ভাৰতীয় বায়ুসেনাৰ বিমান দুৰ্ঘটনাৰ সংখ্যাৰ তথ্য প্ৰকাশ কৰে । ২০২১-২২ বৰ্ষত সংঘটিত নখন আই এ এফ বিমান দুৰ্ঘটনা আৰু ২০১৮-১৯ বৰ্ষত ১১ টা দুৰ্ঘটনাকে ধৰি এই সময়ঠোৱাত মুঠ দুৰ্ঘটনাৰ সংখ্যা আছিল ৩৪ টা ।
প্ৰতিবেদনত প্ৰকাশ কৰা তথ্যত 'কাৰণ' শীৰ্ষক এটা স্তম্ভও আছিল । তাত এই সময়ছোৱাত সংঘটিত দুৰ্ঘটনাৰ বিপৰীতে দুৰ্ঘটনাৰ কাৰণ, বিমানৰ প্ৰকাৰ আৰু তাৰিখ উল্লেখ আছিল । প্ৰতিবেদনত প্ৰকাশ কৰা 33 নম্বৰ দুৰ্ঘটনাটোৰ তথ্যত বিমানখনক 'এম আই-17', তাৰিখ '08.12.2021' বুলি উল্লেখ কৰা হৈছে আৰু ইয়াৰ কাৰণ হৈছে 'এইচ ই(এ)' (HE(A)) বা 'মানৱীয় ত্ৰুটি (এয়াৰক্ৰু)' (human error (aircrew)) ।
প্ৰতিৰক্ষা মন্ত্ৰালয়ে সমিতিক জনাইছিল যে এই সময়ছোৱাত এই দুৰ্ঘটনাবোৰৰ ভিতৰৰ ৩৪ টাৰ অনুসন্ধান কৰা হৈছে । "মন্ত্ৰণালয়ে লগতে জনায় যে এই তদন্ত সমিতিবোৰে প্ৰদান কৰা পৰামৰ্শসমূহে দুৰ্ঘটনাৰ পুনৰাবৃত্তি প্ৰতিহত কৰাৰ উদ্দেশ্যৰে প্ৰক্ৰিয়া, পদ্ধতি, প্ৰশিক্ষণ, সঁজুলি, ব্যৱহাৰ, কাৰ্যকলাপ, তত্ত্বাৱধান আৰু প্ৰশাসনৰ সামগ্ৰিক পৰ্যালোচনা কৰে ।" প্ৰতিবেদনখনত কোৱা হৈছে ।
মন্ত্ৰণালয়ে লগতে জনায় যে "বিমান কৰ্মচাৰীৰ প্ৰধানে প্ৰদান কৰা মন্তব্যৰ ভিত্তিত নিৰ্ধাৰিত সকলো প্ৰতিকাৰমূলক ব্যৱস্থা বাধ্যতামূলক কৰা হৈছে আৰু পদক্ষেপ গ্ৰহণ কৰা হৈছে" । "বেছিভাগেই কাৰ্যকৰী হৈ থকাৰ বিপৰীতে কিছুমানৰ ক্ষেত্ৰত পদক্ষেপ গ্ৰহণৰ অধীনত আছে ।" প্ৰতিবেদনত লগতে কোৱা হৈছে ।
