নতুন দিল্লী:লোকসভাৰ বিৰোধী উপ-দলপতি গৌৰৱ গগৈয়ে তিব্বতৰ ইয়াৰলুং ছাংপো নদীত বিশ্বৰ সৰ্ববৃহৎ জলবিদ্যুৎ বান্ধ নিৰ্মাণৰ চীনৰ পৰিকল্পনা সন্দৰ্ভত আজি অৰ্থাৎ মঙলবাৰে সংসদত গভীৰ উদ্বিগ্নতা প্ৰকাশ কৰে ৷ কংগ্ৰেছ সাংসদগৰাকীয়ে ভাৰতৰ ৰাষ্ট্ৰীয় নিৰাপত্তা, জল সুৰক্ষা আৰু আঞ্চলিক স্থিতিশীলতাৰ ওপৰত এই প্ৰকল্পই পেলাব পৰা গভীৰ প্ৰভাৱ সম্পৰ্কত গুৰুত্ব আৰোপ কৰি তাৎক্ষণিকভাৱে কেন্দ্ৰক ব্যৱস্থা গ্ৰহণৰ আহ্বান জনায় ।
তিব্বতৰ পৰিকল্পনাত গভীৰ উদ্বিগ্নতা প্ৰকাশ কৰি যোৰহাটৰ কংগ্ৰেছ সাংসদগৰাকীয়ে কয় যে তেওঁ ইতিমধ্যে প্ৰতিৰক্ষা মন্ত্ৰী আৰু বৈদেশিক পৰিক্ৰমা মন্ত্ৰী উভয়কে ব্ৰহ্মপুত্ৰৰ জলসম্পদৰ ওপৰত চীনৰ অসমতাপূৰ্ণ নিয়ন্ত্ৰণৰ বিষয়ে শংকা উত্থাপন কৰি অৱগত কৰিছে । চীনে ভাৰতলৈ পানী এৰাৰ ক্ষেত্ৰত হেতালি খেলাৰ আশংকাক আঙুলিয়াই দি তেওঁ কয় যে ইয়াৰ ফলত ভাৰতৰ উত্তৰ-পূবৰ ৰাজ্যসমূহত ভয়ানক প্ৰাকৃতিক দুৰ্যোগৰ সৃষ্টি হ’ব পাৰে ! বানপানী বা বিধ্বংসী খৰাং পৰিস্থিতিৰ সৃষ্টি হ’ব পাৰে ।