নিউজ ডেস্ক, 22 আগষ্ট:মুম্বাইৰ পৰা যাবলগীয়া এয়াৰ ইণ্ডিয়াৰ এখন বিমানত বোমাৰ ভাবুকিৰ পিছত বৃহস্পতিবাৰে তিৰুৱন্তপুৰম আন্তঃৰাষ্ট্ৰীয় বিমানবন্দৰত সম্পূৰ্ণ জৰুৰীকালীন অৱস্থা ঘোষণা কৰা হয়, বিমানবন্দৰৰ সূত্ৰই জনায় এই কথা । 135 জন যাত্ৰীৰ সৈতে বিমানখন পুৱা প্ৰায় 8 বজাত বিমানবন্দৰত সুৰক্ষিতভাৱে অৱতৰণ কৰিছিল আৰু বিমানখন এক পৃথক স্থানলৈ স্থানান্তৰিত কৰা বুলি তেওঁলোকে কয় । যাত্ৰীসকলক পুৱা 8.44 বজাৰ ভিতৰত বিমানখনৰ পৰা সুৰক্ষিতভাৱে উলিয়াই অনা হয় বুলি বিমানবন্দৰৰ সূত্ৰই জনায় ।
বিমানখন তিৰুৱন্তপুৰম বিমানবন্দৰৰ ওচৰ চাপি অহাৰ লগে লগে পাইলটজনে পুৱা 7.30 বজাত বোমাৰ ভাবুকিৰ বিষয়ে অৱগত কৰা বুলি সূত্ৰটোৱে জনায় । পৰৱৰ্তী সময়ত, পুৱা 7.36 বজাত বিমানবন্দৰত সম্পূৰ্ণ জৰুৰীকালীন অৱস্থা ঘোষণা কৰা হয় । "যাত্ৰীৰ জীৱনৰ সুৰক্ষাৰ ক্ষেত্ৰত কোনো প্ৰভাৱ পৰা নাই । বিমানবন্দৰৰ কাম-কাজ বৰ্তমান নিৰৱিচ্ছিন্ন হৈ আছে," বুলি সূত্ৰটোৱে কয় । তেওঁলোকে লগতে কয় যে ভাবুকিৰ উৎপত্তি আৰু অন্যান্য তথ্যৰ বিষয়ে জানিবলৈ প্ৰচেষ্টা চলি আছে ।
তিৰুৱন্তপুৰম আন্তঃৰাষ্ট্ৰীয় বিমানবন্দৰৰ এক বিবৃতি অনুসৰি, "এআই 657 (বিওএম-টিআৰভি)য়ে 22 আগষ্ট, 2024 তাৰিখে 07.30 বজাত বোমাৰ ভাবুকিৰ তথ্য দিছিল । তিৰুৱন্তপুৰম বিমানবন্দৰত 07.36 বজাত সম্পূৰ্ণ জৰুৰীকালীন অৱস্থা ঘোষণা কৰা হৈছিল । বিমানখন সুৰক্ষিতভাৱে অৱতৰণ কৰিছিল । ইয়াক এতিয়া আইচ'লেচন বে’ত ৰখা হৈছে, য'ত স্থানান্তৰ প্ৰক্ৰিয়া আৰম্ভ হৈছে । যাত্ৰীৰ জীৱনত কোনো প্ৰভাৱ পৰা নাই । বিমানবন্দৰৰ কাম-কাজ বৰ্তমান নিৰৱচ্ছিন্ন হৈ আছে ।"