গুৱাহাটী: "ৰাজ্যৰ ভিতৰতে ডিব্ৰুগড় জিলাত আটাইতকৈ অধিক বাল্যবিবাহৰ ঘটনা সংঘটিত হয় ৷" এই মন্তব্য কন্ঠশিল্পী তথা ইউনিচেফৰ যুৱ এডভোকেট নাহিদ আফ্ৰিনৰ । বিশ্ব শিশু দিৱসৰ কাৰ্যসূচীত অংশগ্ৰহণ কৰি নাহিদ আফ্ৰিনে সকলোকে শুভেচ্ছা জনাই কয়,"ইউনিচেফৰ যুৱ এডভোকেট হিচাপে মোৰ দায়িত্ব আছে শিশুৰ সমস্যাৰ বিষয়ে সজাগ কৰাৰ । মই বিশেষকৈ বাল্যবিবাহ, মানসিক স্বাস্থ্য আদিৰ ওপৰত কাম কৰি আছোঁ ।"
জনপ্ৰিয় কণ্ঠশিল্পীগৰাকীয়ে লগতে কয়,"অসমত বাল্যবিবাহৰ সমস্যা এটা গুৰুত্বপূৰ্ণ সমস্যা । সেয়েহে বাল্যবিবাহৰ নেতিবাচক প্ৰভাৱৰ বিষয়ে শিশুৰ লগতে অভিভাৱক সকলক সজাগ কৰাৰ চেষ্টা কৰি আছোঁ । অসমৰ ডিব্ৰুগড় জিলাত বাল্যবিবাহ সমস্যা অধিক দেখা গৈছে । তাৰ ওপৰত আমি কাম কৰি আছোঁ । তদুপৰি মুম্বাইত মানসিক স্বাস্থ্যৰ ওপৰত কাম কৰি আছোঁ । কিয়নো চহৰত বেছিকৈ মানসিক সমস্যাত ভোগা দেখা যায় । সেয়েহে ছাত্ৰ ছাত্ৰীৰ মাজত মানসিক স্বাস্থ্যৰ ওপৰত সজাগতা সৃষ্টি কৰিছোঁ । অতি শীঘ্ৰে মানসিক চিকিৎসাৰ ওপৰত প্ৰশিক্ষণ দিয়া হ'ব ।"
আনহাতে মুখ্যমন্ত্ৰী হিমন্ত বিশ্ব শৰ্মাই ছচিয়েল মিডিয়াত যোৱা ফেব্ৰুৱাৰীত দিয়া তথ্য অনুসৰি ৰাজ্যত ধুবুৰী জিলাত সৰ্বাধিক বাল্য বিবাহৰ গোচৰ ৰুজু হৈছে । ৩৬ খন জিলাৰ ভিতৰত ধুবুৰী জিলাত সৰ্বাধিক বাল্য বিবাহৰ গোচৰ ৰুজু হোৱাৰ লগতে দ্বিতীয় আৰু তৃতীয় স্থানত আছে হোজাই আৰু ওদালগুৰি জিলা । মুখ্যমন্ত্ৰী শৰ্মাই দিয়া তথ্য অনুসৰি বাল্য বিবাহৰ গোচৰ ধুবুৰী জিলাত ৩৭০ টা, ২৫৫টা হোজাই জিলাত আৰু ওদালগুৰি জিলাত ২৩৫ টা গোচৰ ৰুজু হৈছে ।
তদুপৰি বাল্য বিবাহৰ সৰ্বনিম্ন গোচৰ ৰুজু হোৱা জিলা তিনিখন হৈছে হাইলাকান্দি, হামৰেন আৰু তিনিচুকীয়া । তথ্য অনুসৰি তিনিচুকীয়া জিলাত ৭৩ টা, হামৰেন জিলাত ১৫ টা আৰু হাইলাকান্দি জিলাত ১ টা গোচৰ ৰুজু হৈছে ।
উল্লেখ্য যে ইউনিচেফৰ উদ্যোগত আৰু ব্ৰহ্মপুত্ৰ ভলীবল লীগৰ সহযোগত বুধবাৰে গুৱাহাটী ভলীবল ক'চিং চেন্টাৰত বিশ্ব শিশু দিৱস পালন কৰা হয় ।
বিশ্ব শিশু দিৱসৰ লগত সংগতি ৰাখি জলবায়ু পৰিৱৰ্তনৰ প্ৰভাৱৰ ওপৰত আলোচনা কৰা হয় । ইয়াৰ পিছতে অনুষ্ঠিত কৰা হয় এখন প্ৰীতি ভলীবল মেচ । অনুষ্ঠানটিত উপস্থিত থাকে ইউনিচেফ অসমৰ মুখ্য বিষয়া মধুলিকা জনাথন, ক্ৰীড়া কল্যান আৰু যুৱকল্যানৰ সচিব কে জে হিলালিকে ধৰি বহুসংখ্যক লোক ।
