حیدرآباد: ورلڈ ایگ ڈے ہر سال اکتوبر کے دوسرے جمعہ کو منایا جاتا ہے۔ اس دن انڈوں کی اہمیت کو یاد کرنے کا موقع ملتا ہے جو کہ آسانی سے دستیاب کھانے کی چیز ہے۔ اس دن کا مقصد لوگوں کو انڈوں کے بارے میں آگاہ کرنا ہے جو ہر عمر کے افراد کو اعلیٰ معیار کے پروٹین، وٹامنز اور معدنیات جیسے ضروری غذائی اجزاء فراہم کرتے ہیں۔ آج کل انڈا ایک کھانے کی چیز ہے جو کئی شکلوں میں استعمال ہوتی ہے اور اس سے کئی طرح کے لذیذ کھانے تیار کیے جاسکتے ہیں۔ چاہے وہ آملیٹ ہو، بھورجی ہو یا سالن۔ نان ویج کھانے والے لوگ انڈے کھانا پسند کرتے ہیں۔
انڈوں کے عالمی دن کی تاریخ:
خیال کیا جاتا ہے کہ انڈوں کا عالمی دن منانے کی روایت 1996 میں ویانا سے شروع ہوئی جہاں ہر سال اکتوبر کے دوسرے جمعہ کو انڈوں کی غذائیت اور خاصیت کو منانے کا فیصلہ کیا گیا۔
ورلڈ ایگ ڈے تھیم:
اس سال ورلڈ ایگ ڈے 2023 کا تھیم 'صحت مند مستقبل کے لیے انڈے' ہے۔ یہ تھیم انڈوں کی غذائیت کی قیمت اور عالمی سطح پر مروجہ غذائیت کی کمی کو دور کرنے کی ان کی صلاحیت پر روشنی ڈالتی ہے۔
انڈے میں کئی وٹامن شامل:
انڈے میں وٹامن ڈی، وٹامن بی 12، کولین، لوہا، رائبوفلاوین/وٹامن B2، پینٹوتھینک ایسڈ (وٹامن B5)، وٹامن اے، وٹامن ای، فاسفورس، فولیٹ، آیوڈین، سیلینیم جیسے ضروری غذائی اجزاء اور وٹامن پائے جاتے ہیں۔
یہ بھی پڑھیں:کیا حمل کے دوران انڈا کھانا محفوظ ہے؟
بھارت میں انڈے کھانے کو پسند کیا جاتا ہے ، یہی وجہ ہے کہ کئی ریاستوں میں اس کی کھپت کافی زیادہ ہے۔ یہ کم وقت میں پک کر تیار ہوجاتا ہے۔ آندھرا پردیش، تمل ناڈو، تلنگانہ، مغربی بنگال اور کرناٹک جیسی ریاستوں کی اہم شراکت کے ساتھ، بھارت انڈوں کی کل پیداوار میں عالمی سطح پر تیسرے نمبر پر ہے۔ حالیہ برسوں میں انڈوں کی فی کس دستیابی میں نمایاں اضافہ دیکھا گیا ہے، جس سے بھارتیوں کی خوراک میں انڈوں کی بڑھتی ہوئی مقبولیت اور اہمیت کو اجاگر کرتا ہے۔
