مغربی بنگال کے بردوان ضلع کے آسنسول سے بھارتیہ جنتاپارٹی کے رکن پارلیمان بابل سپریو کا کہنا ہے کہ گورنر کا عہدہ آئینی اور اعلیٰ ہوتا ہے۔ ان کے ساتھ اگر کوئی برا سلوک کرتا ہے تو اس کی ذمہ داری کسی نہ کسی کو لینی پڑے گی۔
انہوں نے کہاکہ جادب پور یونیورسٹی میں گورنر جگدیپ دھنکر کے ساتھ جو کچھ بھی ہوا ۔اس سے پورا ملک صدمے میں ہے۔ گورنر کا عہدہ آئینی اور اعلیٰ ہوتا ہے۔ لیکن ان کے ساتھ جو کچھ ہوا ویسا تو عام آدمی کے ساتھ بھی نہیں ہوتا ہے۔
مرکزی وزیر برائے مملکت کاکہنا ہے کہ گورنر جگدیپ دھنکر ہمیشہ سے ہی شہریت ترمیمی ایکٹ ، این آرسی اور این پی آر کے خلاف جاری پرُتشدد مظاہرے کے خلاف آواز بلند کرتے رہے ہیں۔
بابل سپریو کے مطابق ریاستی حکومت کو گورنر کی مخالفت پسند نہیں تھی۔ حکومت کے اشارے پر ہی جادب پور یونیورسٹی میں گورنر کے ساتھ غیراخلاقی سلوک کیاگیا ۔
رکن پارلیمان کا کہنا ہے کہ ترنمول کانگریس کی سربراہ اور وزیراعلیٰ ممتابنر جی کی ہدایت پر ریاست بھر میں شہریت ترمیمی ایکٹ، این آرسی اور این پی آر کے خلاف پرُتشدد مظاہرے کیے جارہے ہیں۔
انہوں نے کہاکہ ممتابنرجی کی وجہ سے ریاست صدر راج کی جانب گامزن ہے۔ آنے والے دنوں میں شہرت ترمیمی ایکٹ ، این آرسی اور این پی آر سے قبل مغربی بنگال میں صدر راج نافذ ہونا حیران کن نہیں ہو گا۔
واضح رہے کہ شہریت ترمیمی ایکٹ کی منظوری کے بعد سے ملک کی دیگر ریاستوں کی طرح مغربی بنگال میں بھی نئے قانون کے خلاف احتجاج کاسلسلہ جاری ہے۔
مسلسل احتجاج کے سبب ریاستی بی جے پی صدردلیپ گھوش، جنرل سکریٹری راہل سنہا،بی جے پی رہنما کیلاش وجے ورگھیہ ،مکل رائے کے بعد اب مرکزی وزیربرائے مملکت بابل سپریو نے بھی مغربی بنگال میں جلد سے جلد صدر راج نافذ کرنے کی بات کہی ہے۔
