مغربی بنگال کے مالدہ ضلع میں دو تانترکوں کے ذریعہ جھاڑ پھونک کے نام پر مبینہ طور پر ایذائیں پہنچانے کے نتیجہ میں دو بچوں کی موت ہو گئی۔یہ دردناک واقعہ گزشتہ روز گوجول بلاک کے قدم تلا گاوں میں پیش آیا۔
موقع پر موجود لوگوں نے بتایا کہ چار بچے کھیلنے کے بعد جب گھر لوٹے تو انہوں نے اپنے والدین سے طبیعت بگڑنے کی شکایت کی جس کے بعد انہوں نے بچوں کے علاج کے لئے دو تانتروں کو گھر بلایا۔
تانترکوں نے تقریبا دو گھنٹے تک جھاڑ پھونک کے نام پر بچوں کو ایذائیں دیں جس کی وجہ سے ان میں سے ایک سات سالہ بچے کی حالت بہت بگڑ گئی۔
اسے اور تین دیگر بچوں کو مالدہ میڈیکل کالج اور اسپتال لے جایا گیا جہاں اسے مردہ قرار دے دیا گیا۔ باقی تین میں سے ایک بچے کی کل رات موت ہو گئی۔
مقامی لوگوں نے بچوں کی موت کے بعد پولیس کو اس کی اطلاع دی لیکن دونوں تانترک پولیس کے پہنچنے سے پہلے ہی فرار ہو گئے۔ باقی دو بچوں کو اسپیشل وارڈ میں رکھا گیا ہے۔
