ترنمول کانگریس کے رہنما کی بی جے پی رکن پارلیمان پرتنقید

ترنمول کانگریس کے سرکردہ رہنما مدن مترا نے عوامی جلسے کو خطاب کرتے ہوئے کہا کہ بیرکپور میں بہت جلد تبدیلی آنے والی ہے، لوگوں کو بی جے پی سے نجات ملنے والی ہے-

شمالی 24پرگنہ کے بیرکپور میں عوامی جلسے کو خطاب کرتے ہوئے ترنمول کانگریس کے رہنما مدن مترا نے کہا کہ بیرکپور میں بہت جلد تبدیلی آنے والی ہے۔

انہوں نے کہا کہ گزشتہ پارلیمانی انتخابات کے بعد سے بیرکپور میں تشدد کا جو کھیل جاری ہے اس پر بریک لگانے کا وقت آگیا ہے۔

ترنمول کانگریس کے رہنما کے مطابق منتخب عوامی نمائندہ کو عوام کا خیال کرنے کی ضرورت ہے لیکن بیرکپور میں سب کچھ الٹا ہو رہا ہے۔

مدن مترا کا کہنا ہے کہ بی جے پی اپنے مقتول رہنما منیش شکلا کی لاش پر سیاست کر رہی ہے۔ بنگال میں اس طرح کی سیاست نہیں ہوتی ہے اگر کوئی ایسا کرتا ہے تو وہ بالکل غلط ہے۔

انہوں نے کہا کہ شمالی 24 پرگنہ ریاست کا واحد ضلع ہے جہاں سب سے زیادہ سیاست کی جاتی ہے۔ اب تو یہاں مرے ہوئے لوگوں کو لے کر سیاست کی جارہی ہے۔اس سے زیادہ افسوس کی بات اور کیا ہوسکتی ہے۔ لوگوں کو اس پر غور کرنے کی ضرورت ہے۔

واضح رہے کہ شمالی 24 پرگنہ کے ٹیٹاگڑھ تھانے کے سامنے بی جے پی کے رہنما اور کاؤنسلرمنیش شکلا کے قتل کے بعد سے بی جے پی اور ترنمول کانگریس کی جانب سے احتجاجی جلوسوں کے اہتمام کرنے کا سلسلہ جاری ہے۔