ریاست مغربی بنگال کے دارالحکومت کولکاتا میں پولیس کی خفیہ ٹیم نے مرکزی کولکاتا کے علیم الدین سٹریٹ میں خصوصی چھاپہ ماری کے بعد مسروقہ موبائل برآمد کرکے اس معاملے میں دو فراد کو گرفتار کیا ہے۔
مغربی بنگال کے دارالحکومت کولکاتا اور اس کے اطراف موبائل فون کی چوری کی وارداتوں میں زبردست اضافہ ہوا ہے۔
ذرائع کے مطابق کولکاتا سے چوری شدہ موبائل کو بنگلہ دیش میں فروخت کیا جاتا ہے، اور مسروقہ موبائل کو وہاں استعمال کیا جاتا ہے۔
کولکاتا پولیس کی خفیہ ٹیم نے خصوصی چھاپہ ماری مہم کے دوران علیم الدین سٹریٹ میں سے محمد جہانگیر اور عبدالغفور بسواس نامی دو افراد کو گرفتار کیا ہے۔
پولیس نے کہا کہ خصوصی چھا پہ ماری مہم کے دوران چوری کے موبائل کو بنگلہ دیش میں سمگلنگ کرنے والے دو لوگوں کو گرفتار کیا گیا ہے۔
پولیس نے بتایا کہ تفتیش کے دوران پتہ چلا ہے کہ دونوں شخص چوری کے موبائل خرید کرکے بنگلہ دیش میں سمگلنگ کیا کرتے ہیں، تاہم پولیس نے ان کے پاس سے 109 عدد موبائل فون برآمد کئے ہیں۔
انہوں نے کہا کہ مسروقہ موبائل کو بنگلہ دیش سمگلنگ کرنے کی کوشش کی جارہی تھی، لیکن پولیس نے خفیہ اطلاع کی بنیاد پر دونوں کو گرفتار کرلیا۔
ذرائع کے مطابق محمد جہانگیر بنگلہ دیشی شہری ہے، اور ممکن ہے کہ وہ بھارت میں بنگلہ دیش سرحد پار کرکے بھارت میں داخل ہوا ہو۔
وہیں دوسری جانب عبدالغفور مقامی شہری ہے، اور دونوں مشترکہ طور پر کاروبار کرتے تھے۔
پولیس نے بتایا کہ پورے معاملے کی تفتیش کی جارہی ہے، اس معاملے میں مزید لوگوں کی گرفتاری عمل میں آسکتی ہے۔
کولکاتا پولیس کی خفیہ ٹیم نے مسروقہ موبائل کے کاروبار کے انکشاف کے بعد کولکاتا اور اس کے اطراف میں بڑے پیمانے پر خصوصی مہم چلانے کافیصلہ کیا ہے۔
