ریاست مغربی بنگال میں ساتویں مرحلے کے تحت34 نشستوں پر ووٹ ڈالے گئے۔کولکاتا کے 11 اسمبلی نشستوں میں جنوبی کولکاتا کے چار اسمبلی نشستوں پر آج ووٹ ڈالے گئے۔ان چار سیٹوں میں کولکاتا پورٹ ،بھوانی پور،راس بہاری اور بالی گنج شامل ہیں۔
بالی گنج اسمبلی حلقہ پر سب کی نظر ہے 2011 سے یہ سیٹ ترنمول کانگریس کے پاس ہے۔ترنمول کانگریس کے سینئیر رہنما سبرتو مکھرجی یہاں سے رکن اسمبلی ہیں۔لیکن اس بار اس سیٹ پر سخت مقابلہ ہے۔یہاں پر ان کا مقابلہ سی پی آئی ایم کے امیدوار ڈاکٹر فواد حلیم سے ہے۔
ڈاکٹر فواد حلیم اپنے سماجی و فلاحی کاموں کے لئے کافی مقبول ہیں۔اس کے علاوہ بالی گنج اسمبلی حلقہ میں سب سے زیادہ اعلی تعلیم یافتہ اور دانشور طبقہ والے ووٹرز ہیں۔فواد حلیم کو تعلیم یافتہ طبقہ کی طرف سے بھرپور حمایت حاصل ہے۔سوشل میڈیا پر بھی کئی سیلیبریٹی اور دانشوروں کو ڈاکٹر فواد حلیم کے لئے ووٹ دینے کی اپیل کی گئی۔
دوسری جانب ترنمول کانگریس کو ممتا بنرجی کے سرکاری اسکیموں کی وجہ سے لوگوں کی حمایت مل رہی ہے۔بالی گنج اسمبلی حلقہ میں 40 فیصد کے قریب مسلم ووٹرز ہیں۔جبکہ اس حلقہ میں بنگالی اشرافیہ کا ایک بڑا حصہ موجود ہے۔
بالی گنج اسمبلی حلقہ کے حوالے سے ایک بات قابل غور ہے کہ ترنمول کانگریس کی سربراہ ممتا بنرجی نے اس اسمبلی حلقہ کے امیدوار سبرتو مکھرجی کے لئے نہ کئی روڈ شو کیا اور نہ ہی کوئی جلسہ جس کی وجہ سے کچھ لوگوں کا کہنا ہے کہ سبرتو مکھرجی کی بی جے پی میں جانے کی قیاس آرائیاں وجہ ہو سکتی ہیں۔ڈاکٹر فواد حلیم کو متحدہ محاذ کی حمایت حاصل ہے۔وہیں بالی گنج اسمبلی حلقہ تعلیمی طور پر سب سے زیادہ ترقی یافتہ حلقہ ہے۔کولکاتا کے سب سے تعلیم یافتہ طبقہ اسی حلقہ میں ہے۔یہی وجہ ہے کہ ُڈاکٹر فواد حلیم کو اس بار اپنی جیت یقینی لگ رہی ہے۔
