مغربی بنگال کے مرشدآباد ضلع میں کانگریس کے مضبوط قلعہ کو مسمار کرنے کے بعد تمام اسمبلی نشستوں پر کامیابی حاصل کرنے والی ترنمول کانگریس کے پنچایت اراکین کے درمیان اختلافات کی خبریں گردش کر رہی ہیں۔
اسی درمیان مرشدآباد ضلع کے مختلف گرام پنچایت میں ترنمول کانگریس کے اراکین اور پردھان کے درمیان شدید اختلافات کی اطلاعات مل رہی ہیں۔
اس معاملے میں جنگی پور ترنمول کانگریس کے صدر جلیل الرحمن نے پارٹی مخالف سرگرمیوں میں ملوث کارکنان کے خلاف کارروائی کا انتباہ دیا ہے۔
ضلع جنگی پور ترنمول کانگریس یونٹ کے صدر جلیل الرحمٰن نے مختلف گرام پنچایت میں ترنمول کانگریس کے اراکین کے درمیان جاری اختلافات کا نوٹس لیا۔
انہوں نے کہا کہ گرام پنچایت کی پردھان بجلی شیخ پر حملہ اور پارٹی دفتر میں توڑ پھوڑ کسی بھی قیمت پر برداشت نہیں کی جا سکتی ہے۔
انہوں نے مزید کہا کہ اس معاملے میں ملوث لوگوں کے خلاف سخت کارروائی کی جائے گی چاہے وہ کوئی بھی ہے۔
ان کا کہنا ہے کہ تمام رہنماؤں کو پارٹی کے اصول و ضوابط اور اخلاق کو ہر حال میں ماننا پڑے گا اس کی خلاف ورزی کی بھاری قیمت چکانی پڑ سکتی ہے۔
واضح رہے کہ گزشتہ روز جنگی پور باون گولہ گرام پنچایت کی پردھان اور ترنمول کانگریس کے اراکین کے درمیان کسی بات پر جھگڑا ہوا تھا اسی درمیان چند لوگوں نے پنچایت پردھان کی پٹائی کر دی تھی جبکہ پارٹی دفتر میں بھی توڑ پھوڑ کی گئی تھی۔
