ڈھاکہ بیت المکرم مسجد کے باہر گزشتہ دس دنوں میں دوسری مرتبہ آج جموں و کشمیر کی نیم خودمختاری والی دفعہ 370کو ہٹائے جانے کے خلاف بنگلہ دیش کی اسلامی جماعتیں احتجاج کررہی ہیں۔
اس کے بعد ہی ڈھاکہ میں واقع بھارتی سفارت خانہ کے باہر سیکورٹی انتظامات سخت کردیے گئے ہیں۔
گزشتہ ہفتے بنگلہ دیش کی اسلامی جماعتوں نے این آر سی اور بھارتی مسلمانوں کے خلاف ہجومی تشدد کے واقعات کے خلاف بیت المکرم مسجد کے باہر بڑی تعداد میں جمع ہوکر احتجاج کیا تھا۔
اسلامک مومنٹ آف بنگلہ دیش کے سیکڑوں کارکنان مفتی سیدفیض الکریم کی قیادت میں بیت المکرم مسجد کے باہر احتجاج کررہے ہیں، احتجاجی جلوس بھارتی سفارت تک نکالنے کا اعلان کیا گیا تھا مگر بڑی تعداد میں پولس اہلکاروں کی تعینات اور حکومت کی سختی کی وجہ سے جلوس کی شکل میں احتجاجی پروگرام نہیں نکالا جائے گا۔
ڈھاکہ پولس کے ذرائع کے مطابق ڈھاکہ میٹرو پولیٹن پولس اور سریع الحرکت فوج کے جوانوں کو بڑی تعداد میں بھارتی سفارت خانہ کے باہر تعینات کردیا گیاہے۔ سفارت خانہ میں آج بھی ویزے کیلئے طویل قطار ہے تاہم سیکورٹی اور جانچ سخت کردی گئی ہے۔
