ترنمول کانگریس کے سینیئر رہنما اور وزیر فرہاد حکیم نے کہا ہے کہ آل انڈیا مجلس اتحاد المسلمین اور بی جے پی کے درمیان کوئی فرق نہیں ہے۔ دونوں سیاسی جماعتیں ایک ہی سکے کے دو پہلو ہیں۔ بہار اسمبلی انتخابات میں اس کی عمدہ مثال دیکھی گئی ہے۔
انہوں نے کہا کہ انتخابات کی تاریخ جیسے جیسے قریب آ رہی ہے ویسے ویسے مذہب کے نام پر سیاست کرنے والی سیاسی جماعتیں پاؤں پھیلانے لگی ہیں۔ مغربی بنگال میں مذہب کے نام پر سیاست کرنے والوں کے لئے کوئی جگہ نہ تھی، نہ ہے اور نہ مستقبل میں ہو گی۔
انہوں نے کہا کہ اے آئی ایم آئی ایم کو بنگال میں انتخابات میں قسمت آزمانے کی کیا ضرورت ہے۔ انہوں نے بہار اسمبلی انتخابات میں سیکولر پسند سیاسی جماعتوں کا بیڑہ غرق کرکے دم لیا اور بنگال کا ماحول بگاڑنے کی سازش کی جا رہی ہے۔
وزیر فرہاد حکیم نے کہا کہ اے آئی ایم آئی ایم بنگال کے عوام کو گمراہ نہیں کر سکتی ہے۔ حیدر آباد کی سیاسی جماعت نے بنگال کے عوام کا مزاج سمجھنے میں بڑی غلطی کر دی ہے۔
