مغربی بنگال میں پوجا سے قبل بند جوٹ ملوں کے دوبارہ کھلنے کا سلسلہ شروع ہو گیا ہے۔ مغربی بنگال کے ہگلی ضلع میں واقع گوندھل پاڑہ جوٹ مل آئندہ یکم نومبر سے دوبارہ کھل جائے گی۔
ہگلی سے بی جے پی کی رکن پارلیمان لاکٹ چٹرجی نے اس کی اطلاع دی ہے۔ انہوں نے کہا کہ برسوں سے بند گوندھل پاڑہ جوٹ آئندہ یکم نومبر سے دوبارہ کھل جائے گی۔ مزدوروں کے لئے یہ بہت ہی خوشی کی بات ہے۔
رکن پارلیمان نے کہا کہ اس کے لئے کافی محنت کرنی پڑی ہے۔ حکمراں جماعت ترنمول کانگریس نے اس ضمن میں کچھ بھی نہیں کیا ہے۔
لاکٹ چٹرجی نے کہا کہ ترنمول کانگریس کی بے بسی کے بعد مرکزی حکومت سے مدد مانگی۔ مرکزی حکومت نے اس مل کو کھلوانے میں بڑی مدد کی ہے۔
انہوں نے کہا کہ ہماری کوشش ہے کہ بنگال کے تمام بند جوٹ ملوں میں دوبارہ کام شروع ہوجائے۔ اس کے لئے ہماری حکومت مسلسل کوشش کر رہی ہے اور اگلے چند مہینوں میں اس کا اثر واضح طور پر سامنے آنے لگے گا۔
انہوں نے مزید کہا کہ اس میں نہیں جانا ہے کہ مل کیوں اور کس وجہ سے بند ہوئی۔ ہمیں یہ سوچ کر خوش ہونا چاہیے کہ بند مل میں دوبارہ کام شروع ہونے والا ہے۔
واضح رہے کہ مغربی بنگال کی جوٹ انڈسٹری پوری دنیا میں مشہور ہے۔ گزشتہ چند برسوں سے بیشتر جوٹ ملوں میں کام بند ہے۔ ان بندکارخانوں کو دوبارہ کھلوانے کی کوشش تیز ہوگئی ہے۔
