مغربی بنگال کے شمالی 24 پرگنہ کے ٹیٹاگڑھ میں واقع جوٹ مل میں خوفناک آتشزدگی کا واقعہ پیش آیا ہے۔ اندرون ماہ دوسری مرتبہ یہاں آگ لگنے کے سبب مل میں موجود لاکھوں مالیت کا سامان جل کر راکھ کے ڈھیر میں تبدیل ہوگیا ہے۔
ذرائع کے مطابق سنیچر کے روز جوٹ مل کے گودام اور چیپمنگ ڈیپارٹمنٹ میں آگ لگ گئی۔ دیکھتے ہی دیکھتے آگ نے خوفناک شکل اختیار کر لی جس کے بعد محکمۂ فائر بریگیڈ کو اطلاع دی گئی۔
فائر بریگیڈ عملہ نے تین فائر انجن کی مدد سے تقریباً چار گھنٹوں کی مشقت کے بعد آگ پر قابو پایا۔
فائر بریگیڈ کے ایک اہلکار نے بتایا کہ آگ لگنے کی وجہ شارٹ سرکٹ ہوسکتی ہے لیکن اس کے باوجود پورے معاملے کی تفتیش کی جارہی ہے، حالانکہ اس حادثے میں کوئی بھی زخمی نہیں ہوا ہے۔
انہوں نے مزید کہا کہ جوٹ مل میں ایک مہینے کے اندر آتشزدگی کا یہ دوسرا واقعہ ہے اور اس تعلق سے مل انتظامیہ پہلے بھی نوٹس دیا جاچکا ہے لیکن مل انتظامیہ نے اس کے باوجود لاپروائی کا مظاہرہ کرتے ہوئے ناگہانی صورت حال سے نمٹنے کے لیے کوئی انتطام نہیں کیا۔
فی الحال مل انتظامیہ کو دوسری مرتبہ نوٹس بھیجنے کے ساتھ ساتھ جوٹ مل کے جنرل منیجر کو فائر بریگیڈ کے دفتر میں طلب کیا گیا ہے۔
