ملک کی دوسری ریاستوں کی طرح مغربی بنگال میں تاریخی عمارتوں کے نام تبدیل کرنے کا سلسلہ اب شروع ہونے کا امکان ہے۔
نیتاجی سبھاش چندر بوس کے125ویں جنم دن کے موقع پر سوشل میڈیا پر اس وقت کئی طرح کی افواہ بازگشت ہے ان میں سے ہی ایک وکٹوریہ میموریل کا نام نیتاجی ہال کرنے کی خبر شامل ہے۔
پہلے ہی سوشل میڈیا پر وکٹوریہ میموریل کا نام بدل کر نیتاجی میموریل یا پھر آزاد ہند فوج ہال کیے جانے سے متعلق افواہ گشت کرنے لگی ہےاس ضمن میں نیتاجی کے خاندان کے رکن سوگتا بوس (ترنمول کانگریس کے سابق رکن پارلیمان) نے کہا کہ ابھی تک ہمیں اس سلسلے میں کوئی اطلاع نہیں ہے۔
دوسری طرف چندر کمار بوس نے کہا کہ یہ سوشل میڈیا پر پھیلائی جانے والی افواہ ہے۔اس سلسلے میں واضح طور پر کچھ کہا نہیں جا سکتا ہے۔
غور طلب ہے کہ ہفتے کے روز یعنی 23 جنوری کو نیتاجی سبھاش چندر بوس کے جنم دن کے موقع پر وزیراعظم نریندر مودی مغربی بنگال کے دورے پر آئیں گے۔وزیراعظم نریندر مودی وکٹوریہ ہال میں نیتاجی سبھاش چندر بوس کے جنم دن کے موقع پر منعقد مختلف تقریبات میں شرکت کریں گے۔
واضح رہے کہ اس سے پہلے بھی سوشل میڈیا پر وکٹوریہ میموریل کا نام بدلنے کو لے کر سوشل میڈیا پر خبریں زیربحث رہی ہے۔
