بھارت کی دوسری ریاستوں کی طرح مغربی بنگال میں بھی عید کی تیاریاں زور و شور سے جاری ہیں، کولکاتا اور اس کے اطراف کے بازاروں میں عید کی خریداری کو لے کر لوگوں کی غیر معمولی بھیڑ امڑ پڑی ہے۔ مغربی بنگال میں دو برسوں میں پہلی مرتبہ بغیر کسی بندش کے عید کا جشن منانے کو لے کر عام لوگوں میں زبردست جوش و خروش پایا جا رہا ہے۔ Preparations for Eid in West Bengal۔ شمالی 24 پرگنہ کے لینن نگر میں واقع ربانی مسجد کے لوگوں سے ای ٹی وی بھارت کے نمائندے نے بات چیت کی، انہوں نے عید کی تیاریوں کو لے کر پر جوش انداز میں تبادلۂ خیال کیا۔ ربانی مسجد کے جنرل سکریٹری ماسٹر محمد مختار نے کہا کہ بغیر کسی بندش کے عید منانے کو لے کر پر جوش ہیں، لیکن احتیاط برتنا بھی ضروری ہے، حالانکہ مغربی بنگال حکومت کی جانب سے ابھی تک ہدایات جاری نہیں ہوئی ہیں۔
سی آر پی ایف کے کمانڈر سکندر علی نے ای ٹی وی بھارت سے گفتگو کرتے ہوئے کہا کہ ہمیں عید کو قومی یکجہتی کے طور منانے کی کوشش کرنی چاہیے، ہم اپنی خوشیوں میں تمام مذاہب کے لوگوں کو شامل کریں گے تبھی ہماری خوشیاں مثالی بنے گی۔ انہوں نے کہا کہ ہم بھارت کے شہری ہیں۔ ہم ہندو، مسلم، سکھ اور عیسائی کے ساتھ رہتے ہیں تو ان کے ساتھ اپنی خوشیاں کیوں نہیں بانٹ سکتے ہیں۔ 27ویں رمضان المبارک کے موقع پر ربانی مسجد میں دعوت افطار کا اہتمام کیا گیا، جس میں سینکڑوں لوگوں نے شرکت کی۔ دعوت افطار کے منتظمین انور میاں نے کہا کہ اللہ ہمیں اسی طرح دعوت افطار کا موقع دے۔ اس موقع پر موجود دیگر لوگوں نے بھی اس مرتبہ بغیر بندش کے عید منانے کو لے کر خوشی کا اظہار کیا لیکن اس کے ساتھ ساتھ احتیاط برتنے کی بات کہی گئی۔
