ریاست مغربی بنگال کے ضلع ہاوڑہ میں اترپردیش کے وزیراعلیٰ یوگی آدیتہ ناتھ نے انتخابی ریلی کو خطاب کرتے ہوئے کہا ہے کہ وزیراعظم نریندر مودی نے جس طرح سے جموں و کشمیر میں امن بحال کیا اور ترقی کی راہ ہموار کی، ٹھیک اسی طرح بنگال کو بھی ترقی کی راہ پر گامزن کریں گے۔
البیڑیا کے آمتا میں بی جے پی کے امیدوار کی حمایت میں انتخابی جلسے کو خطاب کرتے ہوئے وزیر اعلیٰ یوگی آدیتہ ناتھ نے کہا 'وزیر اعظم نریندر مودی نے جموں و کشمیر میں دفعہ 370 منسوخ کر کے پورے ملک کو مثبت پیغام دیا ہے۔ وزیراعظم نریندر مودی اور وزیر داخلہ امت شاہ کی مشترکہ کوششوں کے سبب جموں و کشمیر سے دفعہ 370 منسوخ کیے جانے کے بعد وہاں ترقی کی راہ ہموار ہوئی'.
انہوں نے کہا 'وزیر اعظم نریندر مودی نے کشمیر میں دہشت کا ماحول ختم کیا۔ ان کے سخت فیصلے کے بعد عسکریت پسندوں کے پاؤں اکھڑ گئے۔ وہاں ترقی کی نئی راہیں ہموار ہوئیں۔ اس سے زیادہ خوشی کی بات اور کیا ہو سکتی ہے۔ اب بنگال کے نوجوان کشمیر میں زمین خرید سکتے ہیں۔ وہاں گھر بسا سکتے ہیں۔ بنگال کے نوجوانوں کے لئے کشمیر کے دروازے کھول دیے گئے ہیں'۔
انہوں نے کہا 'بنگال میں تبدیلی کی لہر جاری ہے۔ اس میں ممتا بنرجی کی حکومت کا خاتمہ یقینی ہے. ممتا بنرجی کی حکومت جائے گی اور بی جے پی کی حکومت آئے گی'۔
انہوں نے کہا 'ممتا بنرجی کو شری رام کے نعرے سے پریشانی ہے۔ وہ بنارس چلی آئیں، انہیں سب کچھ سکھایا دیا جائے گا'۔
یہ بھی پڑھیے
جموں و کشمیر : 573 نئے کووڈ کیسز، تین افراد کی موت
ان کا مزید کہنا تھا 'ممتا بنرجی کو اقتدار میں رہنے کا کوئی حق نہیں ہے۔ اگر وہ خود سے اقتدار سے بے دخل نہیں ہوتی ہیں، تو انہیں اور ان کی پارٹی کو عوام ریاست سے بے دخل کر دیں گی'۔
