مغربی بنگال کے شمالی 24 پرگنہ کے بشیر ہاٹ سے رکن پارلیمان نصرت جہاں کے سابق باڈی گارڈ کو پولیس نے جعلسازی کے الزام میں گرفتار کر لیا۔ ذرائع کے مطابق کولکاتا پولیس کی اسپیشل ٹاسک فورس کی ٹیم نے شمالی 24 پرگنہ کے بشیر ہاٹ پارلیمانی حلقے میں خصوصی چھاپہ ماری مہم کے دوران رکن پارلیمان نصرت جہاں کے سابق باڈی گارڈ کو گرفتار کر لیا۔ Former Bodyguard Arrested for Forgery
پولیس نے کہا کہ گرفتار شخص کی شناخت اتم سرکار کے طور پر ہوئی ہے۔ وہ کولکاتا پولیس میں کانسٹیبل کے عہدے پر ملازمت کرتا ہے۔ذرائع کے مطابق کانسٹیبل اتم سرکار پر رکن پارلیمان نصرت جہاں کے لیٹر پیڈ کا بھی استعمال کرنے کا الزام عائد کیا گیا ہے۔پولیس نے کہا کہ پورے معاملے کی تفتیش کی جا رہی ہے۔
گرفتار پولیس اہلکار پر پولیس میں نوکری سمیت دیگر شعبے میں ملازمت دلانے کے نام پر لاکھوں روپے ٹھگنے کا الزام ہے۔ اس کے ساتھ ساتھ رکن پارلیمان کے لیٹر پیڈ کا استعمال کرکے برتھ سرٹیفکیٹ، ڈیتھ سرٹیفکیٹ سمیت دیگر ترقیاتی منصوبوں میں لاکھوں روپیے کی جعلسازی کے علاوہ کانسٹیبل اتم سرکار پر بشیر ہاٹ میں تقریباً چالیس لاکھ روپے کا دھوکہ دہی کا الزام ہے۔ اس کے دوسرے ساتھیوں کی بھی تلاش جاری ہے۔
