مغربی بنگال کے شمالی 24 پرگنہ کے مسلم اکثریتی اسمبلی حلقہ کمرہٹی سے ترنمول کانگریس کے رکن پارلیمان مدن مترا نے نام لئے بغیر وزیراعظم نریندر مودی، وزیر داخلہ امت شاہ سمیت بی جے پی کے دوسرے اعلیٰ رہنماؤں پر شدید تنقید کی۔
انہوں نے کہا کہ اسمبلی انتخابات سے قبل کورونا وائرس کے نئے کیسز کی یومیہ تعداد آٹھ دس تھی لیکن جب سے بیرونی ریاستوں کے رہنماؤں کے بنگال آنے جانے کا سلسلہ شروع ہوا اس وقت سے ہی کورونا وائرس کے نئے کیسز کی تعداد میں تیزی سے اضافہ ہوا ہے۔
سابق وزیر کھیل اور موجودہ رکن اسمبلی کا کہنا ہے کہ جب ملک کی دوسری ریاستوں میں یومیہ کورونا کے ہزار کیسز آتے تھے اس وقت بنگال میں 50 سے کم کیسز ریکارڈ کئے جاتے تھے۔ انہوں نے کہا کہ انتخابی سرگرمیوں میں تیزی کے ساتھ ساتھ بیرونی ریاستوں سے تعلق رکھنے والے بی جے پی کے رہنماؤں کے آنے کا سلسلہ شروع ہوا اس کے بعد سے ہی سارا معاملہ بگڑ گیا۔
ترنمول کانگریس کے رکن اسمبلی کا کہنا ہے کہ جانے والے چلے گئے لیکن جاتے جاتے بنگال کو کورونا کا سنگین تحفہ دے گئے۔ انہوں نے کہا کہ بنگال کے لوگ اس غلطی کو کبھی بھی معاف نہیں کریں گے اور ریاست میں کورونا وائرس صورتحال کو سنگین کرنے والے کو ایک دن ضرور سبق سکھائیں گے۔
