مغربی بنگال میں ان دنوں تہواروں کا موسم چل رہا ہے جو ایک مہینہ یعنی اگلے ماہ نومبر تک جاری رہے گا جس کے باعث پولیس انتظامیہ کی مصروفیات بڑھ گئی ہیں۔ کولکاتا پولیس اور مغربی بنگال پولیس کی عدم دستیابی کا عام زندگی کے ساتھ ساتھ کھیل کے میدانوں میں کھیل کود کی سرگرمیوں پر بھی گہرا اثر پڑتا ہوا دکھائی دینے لگا ہے. اس کے باعث 18 اکتوبر کو ہونے والا کلکتہ فٹبال لیگ 2021 کا خطابی معرکہ ایک ماہ کے لئے ملتوی کردیا گیا ہے. اب یہ فائنل میچ 18 اکتوبر کے بجائے 18 نومبر کو کھیلا جائے گا.
انڈین فٹبال ایسوسی ایشن (مغربی بنگال شاخ ) کے دفتر میں ریاستی فٹبال ادارہ، پولیس کے اعلیٰ افسران اور محمڈن اسپورٹنگ کے عہدیداروں کے ساتھ ہوئی ایک اہم میٹنگ کے بعد کلکتہ فٹبال لیگ 2021 کے خطابی کو ایک ماہ کے لئے ملتوی کرنے کا فیصلہ لیا گیا. محمڈن اسپورٹنگ کے جنرل سکریٹری دانش نے ای ٹی وی بھارت کے نمائندے کو فون کے ذریعہ بتایا کہ کلکتہ فٹبال لیگ 2021 کے فائنل میچ کو 18 نومبر تک کے لئے ملتوی کردیا گیا ہے. انہوں نے کہا کہ فائل میچ سالٹ لیک اسٹیڈیم میں کھیلا جائے گا۔میچ سے ایک ہفتہ پہلے شیدائیوں کے درمیان ٹکٹ تقسیم کیا جائے گا. پچاس فیصد شیدائیوں کو اسٹیڈیم میں داخل ہونے کی اجازت دی گئی ہے. واضح رہے کہ 41 برسوں بعد محمڈن اسپورٹنگ کی ٹیم کلکتہ فٹبال لیگ کا خطاب جیتنے کے بالکل نزدیک پہنچی ہے. 1981 میں محمڈن اسپورٹنگ کی ٹیم آخری مرتبہ کلکتہ فٹبال لیگ کی ٹرافی جیتی تھی. سیاہ سفید جرسی والی ٹیم محمڈن اسپورٹنگ نے یونائٹیڈ ایس سی کو دوسرے سیمی فائنل مقابلے میں 0-1 سے شکست دے کر کلکتہ فٹبال لیگ 2021 کے فائنل میں شاہانہ انداز میں داخلہ لے لیا تھا.
دوسری طرف ریلوے ایف سی کے پاس کلکتہ فٹبال لیگ کی تاریخ میں پہلی مرتبہ خطاب جیتنے کا سنہرا موقع ہے. ریلوے کی اس ٹیم نے دفاعی چیمپئن پیرلیس ایس سی کو 0-4 سے شکست دے کر خطابی معرکہ میں جگہ بنائی تھی۔
