پی ڈی پی لیڈر التجا مفتی کو اتوار کے روز بلاور سے واپسی کے بعد پولیس نے حراست میں لے لیا، جہاں وہ مکھن دین کے اہل خانہ سے تعزیت کرنے گئی تھیں، جنہوں نے حال ہی میں ایک عسکریت پسندانہ معاملہ میں دوران پوچھ گچھ مبینہ طور پر پولیس کے تشدد کا نشانہ بننے کے بعد خودکشی کرلی تھی جس میں چار فوجی مارے گئے تھے۔
پولیس نے 25 سالہ نوجوان مکھن دین کو پوچھ گچھ کے دوران تشدد کا نشانہ بنانے کی تردید کی۔ کٹھوعہ کے ضلع مجسٹریٹ اور پولیس نے مکھن دین کی موت کی الگ الگ انکوائری کا حکم دیا ہے۔ ایکس پر ایک ویڈیو پوسٹ میں التجا مفتی نے دعویٰ کیا کہ انہیں سرکٹ ہاؤس میں حراست میں لیا گیا۔ ویڈیو میں، وہ ایک پولیس افسر سے پوچھ رہی ہے کہ انہیں سرکٹ ہاؤس کمپلیکس سے باہر جانے کی اجازت کیوں نہیں دی جا رہی ہے۔
سابق وزیر اعلیٰ محبوبہ مفتی کی بیٹی التجا مفتی کو پریس کانفرنس سے خطاب کرنے کی اجازت نہیں دی گئی۔ سرکٹ ہاؤس کے گیٹ پر پولیس اہلکار تعینات ہیں۔
یہ بھی پڑھیں: محبوبہ مفتی اور التجا مفتی خانہ نظربند، ایک بیان کے بعد گھر کے دروازے بند - MEHBOOBA MUFTI UNDER HOUSE ARREST
التجا نے ایکس پر لکھاکہ "اب سرکٹ ہاؤس جموں میں نظر بند ہوں، یہ سب اس لیے کہ جموں پولیس چاہتی تھی کہ میں شام 4 بجے کے لیے ہونے والی اپنی پریس کانفرنس منسوخ کردوں۔ یہ ہے نیا کشمیر اور اس کا اصل چہرہ۔ منتخب حکومت انسانی حقوق کی خلاف ورزیوں کے متاثرین کا خیال رکھنے کے لیے دہلی میں ظہرانے کی میزبانی میں بہت مصروف ہے‘‘۔
