مغربی بنگال کے گورنر جگدیپ دھنکڑ اور ریاستی انتخابی کمیشن سورو داس کے درمیان آج راج بھون میں ملاقات ہوئی۔ اس دوران دونوں نے بلدیاتی انتخابات کے دوران ہوئے پرتشدد واقعات پر تبادلہ خیال کیا۔
گورنر جگدیپ دھنکر نے ریاستی الیکشن کمیشن کے کمشنر کے ساتھ ملاقات کے بعد ٹوئٹ میں لکھا کہ بلدیاتی انتخابات کے دوران جو کچھ بھی ہوا اس کی جتنی بھی مذمت کی جائے وہ کم ہے۔
انہوں نے کہا کہ بلدیاتی انتخابات کے دوران یہ کس طرح کے سیکیورٹی انتظامات تھے جس سے پوری ریاست میں تشدد کی آگ بھڑک گئی تھی۔ اس کا ذمہ دار کون ہے۔
گورنر جگدیپ دھنکر نے ریاستی الیکشن کمیشن کے سربراہ سورو داس سے سوال کیا کہ جن جن بوتھوں پر تشدد کے واقعات رونما ہوئے ہیں ان بوتھوں پر دوبارہ انتخابات کرانے کی کتنی گنجائش ہے۔
مزید پڑھیں:
انہوں نے کہا کہ ان پولنگ بوتھوں پر دوبارہ انتخابات کرانے کے تمام تر انتظامات کئے جائیں تاکہ لوگوں کا پولیس انتظامیہ پر بھروسہ برقرار رہے۔
واضح رہے کہ مغربی بنگال انتخابی کمیشن نے 1130 پولنگ بوتھوں میں سے صرف دو پولنگ بوتھ پر دوبارہ انتخابات کرانے کا اعلان کیا ہے، مغربی بنگال انتخابی کمیشن کے اس اعلان کو سی پی آئی ایم، کانگریس اور بی جے پی نے بھدا مذاق قرار دیا ہے۔
