مغربی بنگال کے جنوبی 24 پرگنہ کے کاکدیپ میں پرورتن ریلی کا افتتاح کرتے ہوئے وزیر داخلہ امت شاہ نے کہا کہ ہم یہاں ممتا دیدی کو اقتدار سے بے دخل کرنے کے لئے نہیں آئے ہیں بلکہ ترنمول کانگریس کے رہنماؤں کی بدعنوانی کے خلاف آواز بلند کرنے آئے ہیں۔
انہوں نے کہا کہ مغربی بنگال میں بدعنوانی عروج پر ہے۔ حکمراں جماعت ترنمول کے رہنماؤں کی بدعنوانی، سنڈیکیٹ راج کے خلاف ہماری لڑائی ہے۔
بی جے پی کے رہنما کا کہنا ہے کہ ہماری لڑائی بدعنوانی کے خلاف ہے۔ اس جنگ میں ہمیں جیت ملنے کا مطلب ممتا بنرجی کی حکومت کا خاتمہ ہے۔
وزیر داخلہ امت شاہ نے کہا کہ مغربی بنگال میں ہمیں جس طرح کی حمایت مل رہی ہے، اس کی امید نہیں تھی۔ لوگوں کو وزیراعظم نریندر مودی سے بڑی امید ہے۔
انہوں نے کہا کہ لوگ مغربی بنگال بی جے پی کی حکومت بنتے ہوئے دیکھنا چاہتے ہیں۔ اس لئے وہ ممتا دیدی کے خلاف بی جے پی کی حمایت کے لئے آگے آ رہے ہیں۔
بی جے پی کے رہنماؤں کا کہنا ہے کہ مغربی بنگال میں ہماری حکومت بنتی ہے تو ہم بنگال کو سونار بنگلہ بنائیں گے۔ اس کے لئے منصوبہ بندی کر لی گئی ہے۔
انہوں نے کہا کہ اس کے ساتھ ساتھ مغربی بنگال کی خواتین کو 30 فیصد ریزرویشن دیا جائے گا۔ اس سے وہ خود مختار بن سکیں گی۔
جنوبی 24 پرگنہ کے کاکدیپ میں ریلی سے خطاب کرتے ہوئے امت شاہ نے کہا کہ کاکدیپ میں ماہی گیر بڑی تعداد میں آباد ہیں۔ ممتا بنرجی کی حکومت نے ان کے لئے کچھ بھی نہیں کیا ہے۔ ہماری حکومت بنتی ہے تو ان کے لئے متعدد ترقیاتی منصوبوں کا اعلان کریں گے۔'
یہ بھی پڑھیں: مغربی بنگال میں امت شاہ اور ممتا بنرجی کی ریلیاں
