ٹی - 20 ورلڈ کپ 2021 کے مین راؤنڈ کے مقابلوں کا اتوار کی شام سے باقاعدہ آغاز ہو جائے گا، جہاں پہلے ہی میچ میں بھارت کا روایتی حریف پاکستان سے مقابلہ ہوگا۔
بھارت کی دوسری ریاستوں کی طرح مغربی بنگال میں ٹی - 20 ورلڈ کپ 2021 کا خمار سر چڑھ کر بولنے لگا ہے۔ کرکٹ کے دیوانوں کی دیوانگی بھی خوب دیکھنے کو مل رہی ہے۔
مغربی بنگال بھارتی کھیل کود کا مرکز ہے۔ اس سلسلے میں یہاں کے لوگوں میں کرکٹ کی دیوانگی دوسری ریاستوں کے مقابلے کافی زیادہ ہے۔
ای ٹی وی بھارت کے نمائندے نے ٹی - 20 ورلڈ کپ 2021 میں بھارت اور روایتی حریف پاکستان سے ہونے والے مقابلے پر عام لوگوں سے بات چیت کی۔ لوگوں نے اس سلسلے میں دلچسپ رائے کا اظہار کیا۔
ای ٹی وی بھارت سے خصوصی گفتگو کرتے ہوئے نوجوان کرکٹروں نے ٹی - 20 ورلڈ کپ 2021 میں کل کھیلے جانے والے میچ میں پاکستان کے خلاف بھارت کو پسندیدہ ٹیم قرار دیا ہے۔
یہ بھی پڑھیں:
ریکارڈ ٹوٹنے کے لیے ہی بنتے ہیں: بابر اعظم
ان کا کہنا ہے کہ ورلڈ کپ کا طویل فارمیٹ ہو یا پھر مختصر فارمیٹ دونوں مقابلوں میں بھارتی ٹیم ہمیشہ سے ہی پاکستان پر بھاری پڑی ہے اور کل کے میچ میں بھی آگے رہے گی۔
انہوں نے کہا کہ بھارتی کرکٹ ٹیم کو پاکستان پر تمام شعبوں میں سبقت حاصل ہے اور اسی بنیاد پر ہمیں جیت ملے گی کیونکہ پاکستان ٹیم کی فیلڈنگ کلب سطح کی ہے۔
نوجوانوں کا کہنا ہے کہ وراٹ کوہلی کل کے میچ میں شاندار کارکردگی کا مظاہرہ کریں گے اور روہت شرما کے بلے سے سنچری بننے والی ہے۔ پاکستان کی کرکٹ ٹیم کے پاس کوئی موقع نہیں ہے اور وہ موقع کی تلاش میں رونا دھونا کرتی رہے گی۔
