مغربی بنگال کے تین اسمبلی سیٹوں پر آئندہ 30 ستمبر کو ہونے والے ضمنی انتخابات کے لئے بایاں محاذ نے اپنے امیدواروں کا اعلان کر دیا ہے۔
ممتا بنرجی کے خلاف بھوانی پورسے سی پی آئی ایم نے پیشے سے وکیل سریجیب بسواس کو امیدوار بنایا ہے۔جنگی پور سے آر ایس پی کے جان عالم اور شمیشیر گنج سےمدثر حسین کو امیدوار بنایاہے۔
درگا پوجا سے قبل ہی مغربی بنگال میں تین اسمبلی سیٹوں کے لئے ضمنی انتخابات آئندہ 30 ستمبر کو ہونے والے ہیں۔ترنمول کانگریس، بی جے پی اور بایاں محاذ میں سخت مقابلہ ہے۔ پردیش کانگریس نے تینوں سیٹوں پر امیدوار کھڑا نہ کرنے کا فیصلہ کیا ہے۔ترنمول کانگریس نے اپنے امیدواروں کے نام کا اعلان پہلے ہی کر دیا تھا۔
یہ بھی پڑھیں:نندی گرام میں سازش کے تحت ہرایا گیا: ممتا بنرجی
ممتا بنرجی کے خلاف بھوانی پور اسمبلی حلقہ سے سی پی آئی ایم نے نوجوان رہنما سریجیب بسواس کو امیدوار بنایا ہے جو پیشے سے وکیل ہیں۔ممتا بنرجی نے بدھ کےروز چیتلا میں ایک میٹنگ کی اور تشہیری مہم کا آغاز بھی کر دیا ہے۔جب کہ بی جے پی ابھی تک امیدواروں کے نام پر حتمی فیصلہ نہیں کر پائی ہے۔
ذرائع کے مطابق تین اسمبلی حلقوں میں ہونے والے ضمنی انتخابات میں مرکزی فورس کی تعیناتی ہوگی۔ہر ایک اسمبلی حلقہ میں مرکزی فورس کی دس کمپنیاں تعینات ہوں گی۔
