لوک سبھا انتخابات میں اتحاد نہیں ہونے کی وجہ سے کراری شکست کا سامنے کرنے والی کانگریس اور سی پی ایم نے سبق لیتے ہوئے کولکاتا میونسپل کارپوریشن انتخاب سے کئی مہینے قبل ہی سیٹوں کی تقسیم پر بات چیت شروع کردی ہے۔
ریاستی کانگریس کے صدر سومن مترا نے کہا ہے کہ کولکاتا میونسپل کارپوریشن انتخاب کیلئے کانگریس نے بایاں محاذ سے سیٹوں کی تقسیم پر بات چیت شروع کردی ہے۔
خیال رہے کہ آج کانگریس نے کولکاتا کارپوریشن میں کٹ منی کے خلاف ایک احتجاجی پروگرام کا انعقاد بھی کیا تھا۔
مترا نے کہا کہ سنڈیکٹ راج کی وجہ سے عوام پریشان حال ہیں۔بنگال کے لوگوں کو پاک صاف حکومت چاہیے۔ بنگال کے عوام اب حکمراں جماعت ترنمول کانگریس سے اب چکے ہیں۔
انہوں نے کہا کہ کچی بستیوں کو ترقی یافتہ بنانے میں کولکاتا کارپوریشن میں ناکام ہے۔ کارپوریشن ریاست کے لوگوں کو رہاش فراہم کرنے میں پوری طرح سے ناکام ثابت ہوا ہے۔
انہوں نے کہا کہ کولکاتا کارپوریشن میں ہزاروں اسامی خالی ہیں مگر اس کو پر کرنے کی کوئی کوشش نہیں ہورہی ہے۔ لوگوں کو ترنمول کانگریس سے بڑی امید تھی لیکن وہ اس پر کھرا اترنے میں پوری طرح سے ناکام رہی ہے۔
قیاس کی جارہی ہے کہ کولکاتا کارپوریشن کے انتخابات میں کانگریس اور سی پی آ ئی ایم ایک ساتھ لڑسکتی ہیں۔ دونوں سیاسی جماعتوں کے درمیان بات چیت جاری ہے۔
