مغربی بنگال کے سلی گوڑی میں گزشتہ دنوں پولیس اور بی جے پی ورکروں کے درمیان جھڑپ میں بی جے پی ورکر الاپن رائے کی موت کے بعد سیاست تیز ہوگئی ہے ۔پولیس نے کہا کہ پوسٹ مارٹم کی رپورٹ کے مطابق موت شاٹ گن کی چوٹوں کی وجہ سے ہوئی ہے۔
مغربی بنگال پولیس نے ایک ٹویٹ میں کہاکہ پولیس شاٹ گن کا استعمال نہیں کرتی ہے۔ ظاہر ہے کہ سلی گوڑی میں کل کے احتجاج کے دوران ، مسلح افراد کو لایا گیا تھا اور انہوں نے آتشیں اسلحہ سے فائر کیا تھا۔
بنگال پولیس نے کہا کہ احتجاج کے درمیان قریب میں کھڑے کسی نامعلوم مسلح شخص نے گولی مارکر ہلاک کردیا ہوگا ۔یہ غیر معمولی بات ہے کہ احتجاج کے دوران مسلح افراد کا آنا اور فائرنگ کرنا ۔
پولیس نے کہا کہ یہ سب تشدد کے لیے کیا گیا تھا ۔اس لیے اس پورے معاملے کی جانچ کی ذمہ داری سی آئی ڈی کےسپرد کرنے کا فیصلہ کیا ہے ۔تمام حقائق کو سامنے اور گھنائونے جرائم میں ملوث افراد کے خلاف سخت کارروائی کی جائے گی ۔
دوسری جانب نے گورنر نے اس معاملے میں اعلی پولس افسران سے رپورٹ طلب کی ہے ۔
بی جے پی رہنما مکل رائے نے اس معاملے کی سی بی آئی جانچ کا مطالبہ کیا ہے ۔بی جے پی نے عدالت سے رجوع کیا ہے ۔عدالت نے ہلاک ہونے والے کی دوبارہ پوسٹ مارٹم کرنے کی ہدایت دیتے ہوئے کہا کہ تین ڈاکٹروں کی موجودگی میں دوبارہ پوسٹ مارٹم ہونی چاہیے۔
